"ස්වර්ණ විමානෙට එහා ලෝකයෙන් "

සිංහල ගීත අඹරේ සදා දිදුළන මහා පහන් ටැඹ පණ්ඩිත් අමරදේව ශුරින් අද දින සිය ප්‍රතාපවත් ජීවන ගමනේ 88 වන ජන්ම දිනය සමරයි.වන්නකු වත්ත වඩුගේ දොන් ඇල්බට් පෙරේරා යන නමින් 1927 දෙසැම්බර් මස 5 වන දින වඩුගේ දොන් ජිනොරිස් සහ මැගී වෙස්ලියානා යන දෙපළට දාව මොරටුව, කොරලවැල්ලේදී  උපත ලැබූ එතුමන් හට සිය මව් පියන් නම් තබන ලද්දේ වාන්නකුල වත්ත වඩුගේ දොන් ඇල්බට් පෙරේරා ලෙසින්ය.‘අමරදේව’ යන නාමය ඔහු ලැබුවේ මහාචාර්ය එදිරිවීර සරච්චන්ද්‍රයන් අතිනි.මහාචාර්ය එදිරිවීර සරච්චන්ද්‍ර විසින් ඇල්බට් පෙරේරා යන්න වෙනුවට ඩබ්ලිව්.ඞී. අමරදේව යන නම යෝජනා කරනු ලැබූ අතර එතැන් පටන් ඔහු ඩබ්ලිව්.ඞී. අමරදේව යන නම භාවිත කලේය .

සිය භාවාත්මක කටහඬින් පමණක්‌ නොව විපුල සංගීත ඥානයෙන් ද දශක ගණනාවක සිට රසිකයන්ගේ හදවතටත් බුද්ධියටත් කරනු ලබන ආමන්ත්‍රණය සෑම විටම පාහේ සුමියුරු නාද මාලාවන් හරහා සන්නිවේදනය විය. සරල ගීතයෙහිද, ගුවන් විදුලි ගීත නාටකයෙහි ද, මුද්‍රා  නාට්‍යයෙහිද, වේදිකා නාට්‍යයෙහි ද, චිත්‍රපට සංගීතයෙහි ද ජන සංගීතයෙහි ද, සංගීත පර්යේෂණයන් හිදී පැතිරී ගිය අමරදේවයන්ගේ ප්‍රතිභාව නිර්මාණාත්මක ලෝකය එළිය කරවීය. සරල ගීතය එහි සරල සීමාවෙන් ඔබ්බට රැගෙන යමින් එය සුභාවිත ගීතයක්‌ බවට පත් කිරීමෙහිලා අමරදේවයන් විසින් සිදු කරන ලද සේවය එතෙක්‌ මෙතෙක්‌ ශ්‍රී ලාංකික සංගීතඥයකු විසින් සිදුකරන ලද මහා ප්‍රයත්නයක ප්‍රතිඵලයක්‌ම විය. ජන ගායනා, මධුවන්ති, රස මියුරු, විජය ගීත, ස්‌වර්ණ වර්ණ වැනි ශ්‍රී ලංකා ගුවන් විදුලි සංස්‌ථාව නිෂ්පාදනය කරන ලද සංගීත වැඩසටහන් ඇසුරෙහි මූලික වශයෙන් බිහි වූ අමරදේවයන්ගේ සුභාවිත ගීතය පසු කාලීන නිර්මාණකරුවන් හට ලබා දුන් ආලෝකය ඉතා විශාලය. 

දේශීය මුද්‍රා නාටක සංගීතයෙහි ද කඩඉමක්‌ සටහන් කරනු ලබන අමරදේවයන් 'රාවණා', 'චණ්‌ඩාලි', 'සාම විජය', 'සැළලිහිනිය', පුෂ්පශෘංගාරය', 'තිත්ත බත' යන මුද්‍රා නාටකයන් හි සංගීතය මෙහෙයවමින් එම  මුද්‍රා නාටකයන්හි ජීවමය ගුණය අලංකාරයෙන් පුරවා දැමීය. චිත්‍රසේන - වජිරා නිර්මාණය කරන ලද 'කරදිය' ඉඟි නළුව අමරදේවයන්ගේ  මුද්‍රා නාටක සංගීතයෙහි විශිෂ්ට කඩඉමක්‌ වූ අතර 'නල දමයන්ති' ඉඟි නළුව,  මුද්‍රා නාටක සංගීතයෙහි අමරදේවයන්ගේ කූටප්‍රාප්තිය සටහන් කරයි. 'කරදිය'  මුද්‍රා නාටකය සඳහා ඔහු නිර්මාණය කරන ලද 'මහ මුහුදේ ඈත ඉඳන්' ගීතය එම  මුද්‍රා නාටකයෙහි සමුදාර්ථය කැටිකොට ගත් සාර්ථක ගීතයකි. එම ගීතය තුළ ධීවර ජනයාගේ ජීවන තත්ත්වය මෙන්ම එහි යථාරූපී පසුබිම සැබෑ ලෙස දෘෂ්‍යමාන කිරීමට අමරදේවයන් දක්‌වා ඇති සංගීත පෙළහර නිර්මාණාත්මක සංගීතඥයකුගේ සැබෑ කෞෂල්‍යය විදහා දක්‌වයි. 'නල දමයන්ති'  මුද්‍රා නාටකය සඳහා ඔහු නිර්මාණය කරන ලද "ඈත කඳුකර හිමව් අරනේ" ගීතය මහගම සේකරයන්ගේද, අමරදේවයන්ගේද සුසංයෝගයෙහි අග්‍ර ඵලයකි. 

මහාචාර්ය සරච්චන්ද්‍රයන්ගේ 'පබාවතී' වේදිකා නාට්‍යයෙන් ඇරඹි අමරදේවයන්ගේ වේදිකා නාට්‍ය සංගීතය එතැන් පටන් සරච්චන්ද්‍රයන්ගේ 'වෙස්‌සන්තර', 'ලෝමහංස්‌, 'බවකඩතුරාව' යන වේදිකා නාට්‍ය ඇසුරෙහි පෝෂණය වූ අතර මේ සෑම වේදිකා නාට්‍යයකම අමරදේවයන් නිර්මාණය කරන ලද මිහිරි තනු එම නාටකයන් හි සාර්ථකත්වයට දායක විය. ගුවන් විදුලි ගීත නාටක සඳහා ද අමරදේවයන් නිර්මාණය කරන ලද ගීත ඒ හා සමානව පිරිපුන් නිර්මාණයන් විය. 'ප්‍රේම තටාකේ' ගීතය ඒ අතර සුවිශේෂී වේ.

 'රන්මුතුදූව', 'ගම්පෙරළිය', 'තුංමං හන්දිය' 'සාගර ජලය' ඇතුළු තවත් චිත්‍රපට රාශියක්‌ සඳහා එළිදැක්‌වුණු අමරදේවයන්ගේ චිත්‍රපට සංගීතය ද එකී චිත්‍රපට වෙනුවෙන් නිර්මාණය කරන ලද චිත්‍රපට ගීත සමුදාය ද සිංහල ගීත සාහිත්‍යය තුළ කැපී පෙනේ. එමෙන්ම අමරදේවයන් වෙනත් චිත්‍රපට සංගීතඥයන් යටතෙහි ගායනා කරන ලද චිත්‍රපට ගීත එම චිත්‍රපටවලට ලබා දුන්නේ ඉතා විශාල වටිනාකමකි. 'සත් සමුදුර' චිත්‍රපටයෙහි ගැයෙන "සිනිදු සුදු මුතු තලාවේ" ගීතය පමණක්‌ වුව එයට සෑහේ. 'ශ්‍රී පතුල' චිත්‍රපටය වෙනුවෙන් ගයනු ලැබූ 'සතර සතිපට්‌ඨානය' ද 'සිරිබෝ අයියා' චිත්‍රපටය වෙනුවෙන් ගයන ලද කවි පංති හරහා ද විද්‍යමාන වනුයේ චිත්‍රපටයෙහි දෘශ්‍ය රූපය සතු ගැඹුර තීව්‍ර කිරීමට ඔහුගේ හඬට ඉතා ප්‍රබල හැකියාවක්‌ ඇති බවයි.

ජන කවියෙහි ආභාෂය අමරදේවයන්ගේ නිර්මාණ සඳහා කරනු ලද බලපෑම අති විශාලය. සීපද ගායනා ඇසුරෙහි බිහිවන "පිලේ පැදුර හේනට අරගෙන එනවා" ගීතය, බලි තොවිල් නාද මාලාව ඇසුරෙහි බිහිවන "බඹරෙකු ආවයි" ගීතය රන් තෙළඹුවේ කවි ඇසුරෙහි බිහිවන "ඔබේ නමින් සෑය බඳිමි" ගීතය ජන ගීයෙහි ආභාෂය ලැබූ "බඹර පැටික්‌කී" "රන්වන් රන්වන් මගෙ රන් කිකිළී", "මිහිරියේ ගැමි ලඳේ", "කැලේ ගහක මල් පිපිලා" යන ගීත ඇතුළු තවත් බොහෝ ගීත මේ සඳහා දැක්‌විය හැකි උදාහරණයන් ය. වැදි ගී සම්ප්‍රදාය ඇසුරෙහි බිහිවන "චන්දො මා බිළිඳේ" ගීතය රබීද්‍ර සංගීතය ඇසුරෙහි බිහිවන "පටු අදහස්‌ නම් පවුරින්" ගීතය සරෝජිනී නායිදු කිවිඳියගේ පද වැලෙහි ඡායානුවාදයක්‌ ලෙස බිහිවන "සන්නාලියනේ" ගීතය අමරදේවයන්ගේ නිර්මාණ ගොන්නෙහි දැකිය හැකි සුවිශේෂී ගීත සඳහා නිදසුන්ය. එමෙන්ම බුදු ගුණ ගීතයෙහි විචිත්‍රත්වය සිංහල ගීත සාහිත්‍යය තුළ නොයෙක්‌ දෘෂ්ටිකෝණයන්ගෙන් විචිත්‍රවත් වුවද, බුදුගුණ ගීතය හරහා මතු වූ සාහිත්‍යමය රස පෝෂණය විදග්ධ භාෂාමය වපසරියක පැතිර ගියේ අමරදේවයන්ගේ වටිනාකම පැහැදිලි ලෙස සනිටුහන් කරමිනි. ළමා ගීත සාහිත්‍යයක්‌ බිහි කිරීමෙහිලා අමරදේවයන් ගත් උත්සාහය සැබවින් ම ප්‍රශස්‌තය. 'සඳපානේ වැලිතලා', 'මනකල් හද විල් ජලයේ', 'වැහි කුමරිය ටිකක්‌ කළුයි' යන ගීත හරහා නිම්නාද වූයේ ළමා මනස සුවපත් කරන්නා වූ හැඟීම් සමුදායකි.

පිලිපීන "රමෝන් මග්සයිසායි" සම්මානය (2001), ඉන්දියානු "පද්ම ශ්‍රි" සම්මානය සහ ශ්‍රි ලංකාවේ කලාකීර්ති ජනාධිපති සම්මානය (1986), මෙන්ම දේශමාන්‍ය සම්මානය(1998) ආදී සම්මාන රැසක් දිනා ගැනීමටද අමරදේව සමත් වෙයි.එමෙන්ම 1967, යුනෙස්කෝ මැනිලා සිම්පෝසියම සහ, "ගවුමි සලාම්" නම් වූ මාලදිවයින් ජාතික ගීය සදහා 1972 දී බ්‍රිතාන්‍ය එළිසබෙත් රැජිනගේ ආරාධනයෙන් යුතුව තනුව නිර්මාණයට දායක වීම ආදියෙන්, ඔහු ජාත්‍යාන්තරය තුළ ලාංකේය අනන්‍යතාව සැළකොට සිටියේය.

------------------------------------------------------------------------------------------------------------

01.ජගන් මෝහිණී 

ජගන් මෝහිණී මධුර භාෂිණී

චාරු දේහිණී කමල වාචිනී

සරස්‌වතී දේවී වන්දේ

සරස්‌වතී දේවී

කම්පිත කංචන මාලා කූජිත

කිංකිණි නූපුර ජාලා  

පාද සරෝජේ කටී තටාකේ 

චංචල නර්තන ලීලා

මීන මකර පංකජ රූපාකුල

අංකික කුංකුම රේඛා 

පූර්ණ කුම්භමිව පීන පයෝධර

පූරිතාමෘත ධාරා 

භාග්‍ය සාධන පුණ්‍ය මුර්ති ධර

සුරකුල වර අභිරූපා 

දේහි දේහි වර දායක හස්‌තේ 

ශුභ මංගල මුද්‍රා

ගායනය - පණ්ඩිත් ඩබ්.ඩී. අමරදේව

පද රචනය - ශ්‍රී චන්ද්‍රරත්න මානවසිංහ

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

02.පාවෙනා නිල් වලාවේ

පාවෙනා නිල් වලාවේ

නදී තලාවේ රිදී ජලාසේ

ඇගේ සිනාවේ

කැළුම් සැඟවුණා දෝ

පාවෙනා නිල් වලාවේ

දියඹ සැලෙන තරඟ පෙළක අතරමං වෙලා

පාළු නිල් දියේ තනිවෙලා

සොයන රුව ඔබේ අප්සරාවියේ

සොයන රුව ඔබේ අප්සරාවියේ

පාවෙනා නිල් වලාවේ

තුරුණු සිතක පැතුම් වැළඳ ඈත පාවෙලා

සිහින නිම්නයේ සැරිසරා

පතන රුව ඔබේ අප්සරාවියේ

පතන රුව ඔබේ අප්සරාවියේ

ගායනය - පණ්ඩිත් ඩබ්.ඩී. අමරදේව

පද රචනය - කුලරත්න ආරියවංශ

තනුව - සරත් දසනායක

------------------------------------------------------------------------------------------------------------

03.පෙර දිනයක

පෙර දිනයක මා පෙම් කළ යුවතිය

සිය පුතු නළවනවා

මගේ ම ගීයක් නැළවිලි ස්වරයෙන්

ඈතින් මතු වෙනවා

නුරාව වෙනුවට ඉඳුනිල් දෙනුවන දයාව වෑහෙනවා

සිනාසුනෙමි මම අවිහිංසක ඇය

කෝල බැලුම් හෙලුවා...

ඉරට සඳට නොකියා හොර රහසේ කාලය වියැකෙනවා

නෙත් අදහන්නට බැරි ලෙස රූ සිරි

කෙමෙන් මැකී යනවා

එදා වගේ තාමත් වැට අද්දර නාමල් පූදිනවා

නොකා නොබී දුක් වින්ද අතීතය

යළි මට සිහිවෙනවා...

ගායනය - පණ්ඩිත් ඩබ්.ඩී. අමරදේව

පද රචනය - සුනිල් සරත් පෙරේරා

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

04.නිම් හිම් සෙව්වා

නිම් හිම් සෙව්වා මා සසරේ

හමු වී යුගයෙන් බැඳි යුගයේ

ලං වී වෙන් වී වරින් වරේ

ඔබ මා රන් හුයකිනි බැඳුණේ

දිවියේ ආශා ගැඹුරින් ගැඹුරේ

ළය ගිම් සනහා අපමයි තැවුණේ

ජන්මෙන් ජන්මේ රැව්දීලා

ඔබ මා නෙතගේ රැඳුණා

ඉර හඳ සේ මා පැතුමන් පැතුවා

සැනසුම් සුයුරේ සසුමන් හෙලුවා

අතරින් පතරේ වියැකීලා

සටනින් අද මා දිනුවා

ගායනය - පණ්ඩිත් ඩබ්.ඩී. අමරදේව

පද රචනය - ඔගස්ටස් විනයාගරත්නම්

තනුව - නිමල් මෙන්ඩිස්

------------------------------------------------------------------------------------------------------------

05.පිලේ පැදුර

පිලේ පැදුර හේනට අරගෙන එනවා

එලා පැදුර මැස්සේ එහි සැතපෙනවා 

රටා වියපු අත් දෙක මට සිහිවෙනවා

හිතේ දුකට එතකොට කවි කියවෙනවා

ඉර පායා ඉර අවරට ගියාදෝ

සඳ පායා සඳ අවරට ගියාදෝ

හැඬූ කඳුළු මුහුදට එක් වුනාදෝ

හැඬූ කඳුළු මුහුදට එක් වුනාදෝ

ළමා ළපටි නෑනා කොයි ගියදෝ

ඔබේ කරට මල් මාලා ගොතන්නට

මදු මල් පිපෙනවා හේනේ වැට දිගට

ඔබේ කටින් ගී සීපද අහන්නට

ඔබේ කටින් ගී සීපද අහන්නට

තවමත් ගිරව් එනවා පෙර පුරුද්දට

පිලේ පැදුර හේනට අරගෙන එනවා

එලා පැදුර මැස්සේ එහි සැතපෙනවා 

රටා වියපු අත් දෙක මට සිහිවෙනවා

හිතේ දුකට එතකොට කවි කියවෙනවා

ගායනය - පණ්ඩිත් ඩබ්.ඩී. අමරදේව

පද රචනය - මහගම සේකර

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

06.රෑ දුරු රට මේ

රෑ දුරු රට මේ

හිම වරුසා සීත පාලුවේ

මූදු සතකින් ඈත දේශේ

මා තනිවේ

කල්පනා ලොව පෙම් දැහැනේ

ක්ෂිතිජ නිම්නයේ

රෑ තනි යහනේ

රෑ දුරු රට මේ හිම වරුසා

සීත පාලුවේ

දෑත වෙන්වී පෙම් විහඟුන්

සිහින තොටුපලේ

රාත්‍රි යාමේ

රෑ දුරු රට මේ හිම වරුසා

සීත පාලුවේ

ගායනය - පණ්ඩිත් ඩබ්.ඩී. අමරදේව

පද රචනය -අජන්තා රණසිංහ

තනුව - සරත් දසනායක

------------------------------------------------------------------------------------------------------------

07.ආදර හැඟුම්

ආදර හැඟුම් ආදර හැඟුම්

නුපුරුදුයි මට නුපුරුදුයි ඒ හැඟුම්

ආදර හැඟුම් ආදර හැඟුම්

කිතිකවයි හද කිතිකවයි ඒ හැඟුම්

ආදර හැඟුම් ආදර හැඟුම්

සැඳෑ අඳුරේ සැළෙන තරු එළි

මගේ හද තුළ කරයි විමසිලි

නැගෙන ගනඳුර වඩයි සිතුවිලි

මේ මඟුල් රෑ බිඳෙයි ඉවසිලි

කිමද ඔබ මල් කුමරියන්නේ

පෙති විදා සතුටින් නොඉන්නේ

රහස නැතිවද මං නොදන්නේ

තුරුළෙ බමරුන් නොවෙද ඉන්නේ

ගායනය - පණ්ඩිත් ඩබ්.ඩී. අමරදේව

පද රචනය - දයානන්ද ගුණවර්ධන

තනුව - සෝමදාස ඇල්විටිගල

------------------------------------------------------------------------------------------------------------

08.සඳ තරු නිහඬයි

සඳ තරු නිහඬයි

ගහ කොළ නිසලයි

මුළු ලොව සැතපෙයි

සිතිවිලි විතරක් අවදි වෙලා

පියා නුවන් යුග නිවා හැඟුම් සිත

සැතපෙන්නට වෙර දරණ පැයේ

පාළුව තනිකම කුටියට අවුදින්

හදවත අවදි කළා

සඳ තරු නිහඬයි

ගහ කොළ නිසලයි

මුළු ලොව සැතපෙයි

සිතිවිලි විතරක් අවදි වෙලා

මවා නුවන් ඔබ ඔබේ තෙපුල්සර

සිහිනයකින් මෙන් ගලා රැයේ

සෙනෙහස හඬවා මතකය ඉකිබිඳ

හදවත අවදි කළා

ගායනය - පණ්ඩිත් ඩබ්.ඩී. අමරදේව

පද - කුලරත්න ආරියවංශ

තනුව - එච්.එම්. ජයවර්ධන

------------------------------------------------------------------------------------------------------------

09.සඳ හොරෙන් 

සඳ හොරෙන් හොරෙන් හොරෙන් බලා

වළා රොදක සැඟවිලා

අපේ මියුරු පෙම් කතා අසා සිටිනවා

අසා සිටිනවා

කදුළු බිදු ගලා සදේ තුරු ලතා පුරා

සියොළඟම සැලී මගේ නොහිම් සීතලේ

ඔබේ නෙත යදී ම්…..ම්…..

මහත් වියරුවෙන්

සඳ හොරෙන් හොරෙන් හොරෙන් බලා

වළා රොදක සැඟවිලා

අපේ මියුරු පෙම් කතා අසා සිටිනවා

අසා සිටිනවා

කියඹු වැල් ලිහී ඔබේ මාරුතේ සැලී

කොපුල් තල ගැටී මගේ සිතුම් සසලවයි

නිවාලන්න මා ම්…..ම්…..

ඔබේ සිසිලසින්

ගායනය - පණ්ඩිත් ඩබ්.ඩී. අමරදේව

පද රචනය - කුලරත්න ආරියවංශ

තනුව - ප්‍රේමසිරි කේමදාස

------------------------------------------------------------------------------------------------------------

10.මේ ගුරු පාරේ

මේ ගුරු පාරේ මේ දොල අයිනේ

අපේ රහස් ඇත සැඟවීලා

අපේ රහස් ඇත ලියැවීලා

පටු මාවත් වල දූවිලි අතරේ

අපගේ ඉපැරණි පිය සටහන් ඇත 

දොල මත දිදුලන පෙණ පිඩු අතරේ

අපේ කතාවේ කෙටි පටුනක් ඇත

මේ ගුරු පාරේ මේ දොල අයිනේ

අපේ රහස් ඇත සැඟවීලා

අපේ රහස් ඇත ලියැවීලා

ඉර හඳ ඇසුවා ඇල දොල දුටුවා

අතිනත් ගෙන අප දෙඩූ කතාබහ 

එනමුදු එදවස් සඟවනු හැකිවේ

ඉරට හඳට ඇල දොලට කතා බැහැ

මේ ගුරු පාරේ මේ දොල අයිනේ

අපේ රහස් ඇත සැඟවීලා

අපේ රහස් ඇත ලියැවීලා

ගායනය - පණ්ඩිත් ඩබ්.ඩී. අමරදේව

පද - මහාචාර්ය සුනිල් ආරියරත්න

තනුව - මහාචාර්ය සනත් නන්දසිරි

------------------------------------------------------------------------------------------------------------

11.කඳුළු කතාවේ

කඳුළු කතාවේ නිමක් දුටුව දා

සිහින ලතාවේ මලක් පිපුණු දා 

සතුටු ගඟක් ගැලුවා

හදට හදක් බැඳුනා

ආසිරි චාමර පවන් සැලී

සෝ දුක් සංකා සෙමින් මැකී 

දෙගුරුන් මිතුරන්

සුපැතුම් මැද්දේ

අපේම ලොව අපි තනිවූයේ

කඳුළු කතාවේ නිමක් දුටුව දා

සිහින ලතාවේ මලක් පිපුණු දා

සතුටු ගඟක් ගැලුවා

හදට හදක් බැඳුනා

සුසුමක පාකර හසුන් යවා

දෙතැනක තනිවී හඬා දොඩා 

ගෙවූ අතීතෙන්

අප සමුගන්නෙමු

අළුත් ලොවක රන් කිරුළු දරා

කඳුළු කතාවේ නිමක් දුටුව දා

සිහින ලතාවේ මලක් පිපුණු දා

සතුටු ගඟක් ගැලුවා

හදට හදක් බැඳුනා

ගායනය - පණ්ඩිත් ඩබ්.ඩී. අමරදේව

පද - බුද්ධදාස ගලප්පත්ති

තනුව - මහාචාර්ය සනත් නන්දසිරි

------------------------------------------------------------------------------------------------------------

12.ඉර හඳ පායන

ඉර හඳ පායන ලෝකේ අලෝකය අතරේ

සැප දුක සමබර වේ

මේ ජීවින කතරේ

මේ ජීවන කතරේ

සැප දුක සමබරවේ

උකුළේ ළමැදේ සමබර උසුලන

ගැමි ලිය යන ගමනේ

මුදු බඳ නැළවෙන සේ

කඳූවැටි ගංගා සාගර එකසේ 

පොළොවට සමබර වේ

මේ ජීවින කතරේ

මේ ජීවන කතරේ

සැප දුක සමබරවේ

වැඩිවන ආශා මැඩලන වේගේ 

ජීවන මග කැළඹේ

ඒකම රස මුසුවේ

මහ මඩ වගුරේ වන විල් මතුවේ 

පියුම් පිපී නැටවේ

මේ ජීවින කතරේ

මේ ජීවන කතරේ

සැප දුක සමබරවේ

ගායනය - පණ්ඩිත් ඩබ්.ඩී. අමරදේව

පද - ශ්‍රී චන්ද්‍රරත්න මානවසිංහ

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

13.දෑතේ එල්ලී 

දෑතේ එල්ලී 

මියුරු කතා කී 

සුරතල් දෝණියනි

කාලයෙ රිය සක 

මහළු මගෙන් ඔබ ඈතට ගෙන යන්නේ 

බොළඳ මියුරු බස් සවන් නිවාලූ

කැකුළු සිනා රස සිත සනහාලූ 

අතීත සිහිනය බොඳවී දියවී

ඈතට පාවෙන්නේ

දෑතේ එල්ලී 

මියුරු කතා කී 

සුරතල් දෝණියනි

කාලයෙ රිය සක 

මහළු මගෙන් ඔබ ඈතට ගෙන යන්නේ

පරපුර වදන ලෙසින් වෙහෙසෙන ඔබ

ඇස නැළවූ සිත පිනවූ

මතක වළාවෙන් නොපෙනෙන ඈතට

වැලිබත පාවෙන්නේ 

ගායනය - පණ්ඩිත් ඩබ්.ඩී. අමරදේව

පද රචනය - ස්වර්ණ ශ්‍රී බණ්ඩාර

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

14.ගී පොතයි මී ව්තයි

ගී පොතයි මී ව්තයි

ඒ දෙකම මට එපා 

යුග නයන ගී පොතයි 

රත ලවන මී විතයි

මා පතන ගී පොතයි මී විතයි

ඔබ සතුයි

අවන්හල නැති සුරා

ලවන් විත පුර පුරා

වහස් බැල්මෙන් නුරා

රහස් ගී කිය කියා

මගේ හදවත එයින්

සදා කල් මත්කරන්

කිසිම ගීයක් ලොවේ

ඒ තරම් රස නොවේ

ගී පොතයි මී ව්තයි

ඒ දෙකම මට එපා 

යුග නයන ගී පොතයි 

රත ලවන මී විතයි

මා පතන ගී පොතයි මී විතයි

ඔබ සතුයි

ගායනය - පණ්ඩිත් ඩබ්.ඩී. අමරදේව

පද රචනය - මහගම සේකර

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

15.හන්තානේ කඳු මුදුන

හන්තානේ කඳු මුදුන සිසාරා 

පවනක් වී එන්නම්

ඔබේ සුවඳ රැඳි කුටිය සමීපේ 

කුසුමක් වී ඉන්නම්

තුන් මහළින් සැදී සරසවි පායේ

මල් කැටයම් සෙවනේ

සිරිපොද වැස්සේ නැගුනු සතුටු රළ

මිරිගු සයුර විනි අතීතයේ

හන්තානේ කඳු මුදුන සිසාරා 

පවනක් වී එන්නම්

ඔබේ සුවඳ රැඳි  කුටිය සමීපේ 

කුසුමක් වී ඉන්නම් 

පාළු නිසංසල කඳු වැටි අතරේ

මහවැලි ගං ඉවුරේ

අත් තටු සිඳගත් විහඟ විලාසෙන්

අපේ පැතුම් ඉකිබිදිනු ඇසේ 

හන්තානේ කඳු මුදුන සිසාරා 

පවනක් වී එන්නම්

ඔබේ සුවඳ රැඳි  කුටිය සමීපේ 

කුසුමක් වී ඉන්නම් 

ගායනය - පණ්ඩිත් ඩබ්.ඩී. අමරදේව

පද රචනය - ආචාර්ය අජන්තා රණසිංහ

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

16.මළ ඉර බසිනා 

මළ ඉර බසිනා සැන්දෑ යාමේ

ඔබගෙන් සමුගන්නම්

අඳුරට ඉඩ දී අඳුරේ සැඟවී

අඳුරට ඉඩ දී අඳුරේ සැඟවී

ඔබගෙන් වෙන්වී මම යන්නම්

නිදි නැති යානේ රෑ යාමේ

කාන්සියේ ඔබ හිඳිනා වේලේ 

සුළඟේ දැවටී ඔබට හොරෙන්

සුළඟේ දැවටී ඔබට හොරෙන්

මම ඔබ වෙත එන්නම්

සියුමැළි දෑතින් ඔබ හිස අතගා

සියුමැළි දෑතින් ඔබ හිස අතගා

ඔබ නිදි කරවා මම යන්නම්

අළුයම පිබිදෙන ඔබගේ දෑසේ

මල් පෙති අග පිණි කඳුළක් රඳවා 

සුසුමක් වාගේ ඉන් පිටවී

සුසුමක් වාගේ ඉන් පිටවී

ඔබගෙන් වෙන් වෙන්නම්

අඳුරට ඉඩ දී අඳුරේ සැඟවී

ගායනය - පණ්ඩිත් ඩබ්.ඩී. අමරදේව

පද රචනය - මහගම සේකර

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

17.මේ ලොව යම්

මේ ලොව යම් කිසිවෙකු

මා හට පෙම් කළ බව

එතකොට ඒ ගී රාවය

හීන් හඬින් මට කියාවි

මා මළ පසු සොහොන් කොතේ

දුක් ගීයක් ලියනු මැනව

දුක් ගීයක් ලියනු මැනව

දුක් ගීයක් ලියනු මැනව

නන්නාඳුනනා ඔබ ගේ ...

නන්නාඳුනනා ඔබ ගේ

අත් අකුරින් ලියනු මැනව

දුක් ගීයක් ලියනු මැනව

දුක් ගීයක් ලියනු මැනව

අඩ සඳ බැසගෙන යන සඳ

සීතල අඳුරු රැයක ...

අඬ සඳ බැසගෙන යන සඳ

රෑහි හඬන රැව් අතරින් ...

එතකොට ඒ ගී රාවය

යාන්තමින් මට ඇසේවී

එතකොට ඒ ගී රාවය

යාන්තමින් මට ඇසේවී

ගායනය - පණ්ඩිත් ඩබ්.ඩී. අමරදේව

පද රචනය - මහගම සේකර

තනුව - සෝමදාස ඇල්විටිගල

------------------------------------------------------------------------------------------------------------

18.ස්වර්ණ විමානෙට

ස්වර්ණ විමානෙට එහා ලෝකයෙන් 

ඔරුවක ගොඩවී මා එනවා 

සවර්ණ වර්ණ රන් එළිය දකින්නට 

රළ රැලි මත නැගිලා එනවා 

ස්වර්ණ විමානෙට එහා ලෝකයෙන් 

රැල්ලේ පාවී වැල්ලේ බිහිවෙන 

සංගීතෙන් අප හමුවෙනවා 

සැන්දෑ යාමේ පෙම් රස කලතා 

සාගර ජල කඳ නැළවෙනවා 

ස්වර්ණ විමානෙට එහා ලෝකයෙන් 

මුතු බෙලි කටු කිරිකවඩි පුරාගෙන 

ඔරුවට ගොඩවී මා එනවා 

මගේ අනාගත පැතුම් විමානෙට 

සෙනෙහස පොදි බැඳගෙන එනවා 

ස්වර්ණ විමානෙට එහා ලෝකයෙන් 

ඔරුවක ගොඩවී මා එනවා 

සවර්ණ වර්ණ රන් එළිය දකින්නට 

රළ රැලි මත නැගිලා එනවා 

ස්වර්ණ විමානෙට එහා ලෝකයෙන් 

ගායනය - පණඩිත් ඩබ්.ඩී. අමරදේව

පද රචනය - මඩවල එස්. රත්නායක

තනුව - පණඩිත් ඩබ්.ඩී. අමරදේව

------------------------------------------------------------------------------------------------------------

19.විකසිත පෙම්

විකසිත පෙම් පොකුරු පියුම්

ඔබේ පයට පොඩි වී ගියා දෙන්

පතිකුලයට අද මට පිටුපා යන

මගේ සොඳුරු ළඳුනේ 

හිතේ කඳුළු බිඳු රෑ තනි යහනේ

ඉහ ඉද්දර ඉඳ ඉකි බිඳිනා සඳ

ආදර සැමරුම් පේ‍්‍රම පුරාණේ

ඔබට විරහ ගිනි නොගෙනේවා 

විකසිත පෙම් පොකුරු පියුම්

ඔබේ පයට පොඩි වී ගියා දෙන්

පතිකුලයට අද මට පිටුපා යන

මගේ සොඳුරු ළඳුනේ 

තනිකම රජයන පාළු විමානේ

ගොම්මන් කළුවර හඬා වැටෙද්දී

ඔබ දිවි අරණේ පැතුම් විජිතයේ

මැණික් පහන් වැට දැල්වේවා 

ගායනය - පණඩිත් ඩබ්.ඩී. අමරදේව

පද රචනය - ආචාර්ය අජන්තා රණසිංහ

තනුව - ආචාර්ය ප්‍රේමසිරි කේමදාස

------------------------------------------------------------------------------------------------------------

20.තාත්තා වුනත් මා 

තාත්තා වුනත් මා බත සරිකරන

අම්මා නුඹයි මගෙ දරුදැරියන් රකින 

මට පෙර උරුම ආලය දරුකැලට දෙමින්

රෑ දාවල් දෙකේ වෙහෙසෙන විටදි නොමින්

ඔබ දුටු මුල් දිනේවත් හදනොනැඟි පෙමින්

උතුරයි මසිත තව නුඹ වෙත තුරුළු වෙමින්

බැතිබර හැඟුම් දනවන නුඹගේ සුවඳ

අතදරු පුතුගෙ මුව කමලේ ඇත නිබඳ

අම්මා කෙනෙක් මිස නුඹ මගෙ බිරිඳ ලෙස

නොහැගේ ලඟින් හිඳ මගේ හිසසිඹින සඳ

තාත්තා වුනත් මා බත සරිකරන

අම්මා නුඹයි මගෙ දරු දැරියන් රකින 

ගායනය - පණ්ඩිත් ඩබ්.ඩී. අමරදේව

පද රචනය - මහාචාර්ය සුනිල් ආරියරත්න

තනුව - ආචාර්ය රෝහණ වීරසිංහ

------------------------------------------------------------------------------------------------------------

21.සන්නාලියනේ

සන්නාලියනේ, සන්නාලිනේ

මේ හිමිදිරි උදයේ

සන්තෝසෙන් ඔබ හිනැහී හිනැහී

කාටද ඇඳුම වියන්නේ

කාටද ඇඳුම වියන්නේ

මාල ගිරා තටු සේම රුවින් යුතු

නිල්වන් ඇඳුම වියන්නේ

කාටද ඇඳුම වියන්නේ

මාල ගිරා තටු සේම රුවින් යුතු

නිල්වන් ඇඳුම වියන්නේ

ඊයේ ඉපදුනු කුළුදුල් දූටයි

මේ පොඩි ඇඳුම වියන්නේ

සන්නාලියනේ සන්නාලිනේ

මේ හැන්දෑ යාමේ

හැඩ වැඩ දමලා ලස්සණ කරලා

කාටද ඇඳුම වියන්නේ

කාටද ඇඳුම වියන්නේ

සැන්දෑ අහසේ රන්වන් පාටින්

දිලිසෙන ඇඳුම වියන්නේ

කාටද ඇඳුම වියන්නේ

සැන්දෑ අහසේ රන්වන් පාටින්

දිලිසෙන ඇඳුම වියන්නේ

ඒ කුළුඳුල් දූ දීගෙක දෙන්නයි

මංගල ඇඳුම වියන්නේ

සන්නාලියනේ, සන්නාලිනේ

සීතල හඳ එලියේ

මැලවුණු මුහුණින් වෙව්ලන දෑතින්

කාටද සළුව වියන්නේ

සීතල සළුව වියන්නේ

කණකොක් තටුවේ සුදුමැලි පාටින්

සීතල සළුව වියන්නේ

කාටද සළුව වියන්නේ

කණකොක් තටුවේ සුදුමැලි පාටින්

සීතල සළුව වියන්නේ

මියගිය ඇයගේ මිනිය වහන්නයි

සීතල සළුව වියන්නේ

ගායනය - පණ්ඩිත් ඩබ්.ඩී. අමරදේව

පද රචනය - මහගම සේකර

තනුව - පණ්ඩිත් ඩබ්.ඩී. අමරදේව

------------------------------------------------------------------------------------------------------------

22.ආරාධනා

ජීවිතයේ තනි මංසල අතරමං වෙලා

හුදෙකලාව සුසුම් හෙළන හදවත සනහා

අතීතයේ ගිලිහී ගිය

සතුට රැගෙන යළි වඩින්න

ආරාධනා ආරාධනා

නෙලූ සුපෙම් කැටයම් හද පවුරු තලාවේ

මැකී ගියාදෝ

කාලයේ වෙරළේ

ජීවිතයේ දිගු ගමනින් අනාථ වූදා

සෙනේහයේ සත් පියුමෙන් යළිදු පිපේවා

ආරාධනා ආරාධනා

එදා සිඟිති කිරි සුවඳින් යුගදිවි අරණේ

ඔබේ උණුහුමේ

යළිදු උපන්නෙමි

බිඳුනු එවන් රජ දහනින් සමුගෙන යනදා

ඔබේ නුවන් පහනින් යළි එළිය ලැබේවා

ආරාධනා ආරාධනා

ගායනය - පණ්ඩිත් ඩබ්.ඩී. අමරදේව

පද රචනය - කුලරත්න ආරියවංශ

තනුව - ආචාර්ය රෝහණ වීරසිංහ

------------------------------------------------------------------------------------------------------------

23.ඇයි කරේ යමෙකු ආලේ 

ඇයි කරේ යමෙකු ආලේ 

මේ ලෝකේ

මේ ලෝකේ මායාකාරී

ඇයි කරේ යමෙකු ආලේ

ඇයි කරේ යමෙකු ආලේ

වනෙහි පක්ෂී තෝරා විසඳා

බලනු නීරස භාවේ 

කරත ආලේ යමෙක් මේ ලෝකේ 

නො තිර සේ දෝෂා

ඇයි කරේ යමෙකු ආලේ

ඇයි කරේ යමෙකු ආලේ

තිරසර ආලේ අමරණීය වේ

පුදනු ජීවිතේ නෑ දුකා 

කර්ම විපාකේ සේ ඒ ආලේ

ජන හටා පැතු සේ පල දේ 

සෑසි ධර්මේ දේ සිත කර්මේ 

පහදා දුනි ලොවටා

ඇයි කරේ යමෙකු ආලේ

ඇයි කරේ යමෙකු ආලේ

ගායනය - පණ්ඩිත් ඩබ්.ඩී. අමරදේව

පද රචනය - ඩී.ටී. ප්‍රනාන්දු

තනුව - මොහොමඩ් ගවුස්

------------------------------------------------------------------------------------------------------------

24.කොළොම්තොට නැත

කොළොම්තොට නැත මහලු වී

අවන්හල නැත පැරණි වී

එදා හඳ ම යි අදත් යෞවනයේ

එහෙත් අප දෙන්නා

බලන් කැඩපත සොඳුරියේ

පෙරුම් පුරමින් හමු වෙලා

උනුන් රහසින් බැන්ද ආදර පෙම්

බලන් කැඩපත සොඳුරියේ

පාට වත්සුනු දෙකොපුලෙන් පිස දා

කොළොම්තොට නැත මහලු වී

අවන්හල නැත පැරණි වී

එදා හඳ ම යි අදත් යෞවනයේ

එහෙත් අප දෙන්නා

බලන් කැඩපත සොඳුරියේ

කුඹ ගසක් උඩ නැවතිලා

සිනා සලමින් සඳේ ඇයි සරදම්

බලන් කැඩපත සොඳුරියේ

කුමන අරුම ද නර කෙසක් නැඟිලා!

කොළොම්තොට නැත මහලු වී

අවන්හල නැත පැරණි වී

එදා හඳ ම යි අදත් යෞවනයේ

එහෙත් අප දෙන්නා

බලන් කැඩපත සොඳුරියේ

ගායනය - පණ්ඩිත් ඩබ්.ඩී. අමරදේව

පද රචනය - ලූෂන් බුලත්සිංහල

තනුව - ගුණදාස කපුගේ

------------------------------------------------------------------------------------------------------------

25.මහ වැස්සක පෙර නිමිති 

මහ වැස්සක පෙර නිමිති පෙනෙනවා

කවුළුව අතරින් හිරිකඩ එනවා

මල්පැණි වඩියක උණුසුම ලබනට

යන්නට ඕනෑ කඩ මණ්ඩිය වෙත

කබාය ඉරිලා ඊට කමක් නැහැ

කවුරු බලන්නද කවුරු දකින්නද

මා දැන් මහළු වියේ

මා දැන් මහළු වියේ

පාරට බැස්සම නොවැ සීතල වැඩි

තනිකම ඊට වැඩී

එකම කුඩය යට අර යුවලක් යන හැඩ

මමත් ඔහොම ගිය හැටි මතකයි

මට හොඳහැටි මතකයි

මී විතකින් ගත උණුසුම් වූව ද

සිත උණුසුම් වේදෝ

එපා එපා මී විත මගෙ දෙතොළට

එපා එපා මී විත මගෙ දෙතොළට

ආපසු මගෙ කුටියට යනවා

මා ආපසු යනවා

කබාය ඉරිලා ඊට කමක් නැහැ

කවුරු බලන්නද කවුරු දකින්නද

මා දැන් මහළු වියේ

මා දැන් මහළු වියේ

ගායනය - පණ්ඩිත් ඩබ්.ඩී. අමරදේව

පද රචනය - කේ.ඩී.කේ. ධර්මවර්ධන

තනුව - මහාචාර්ය සනත් නන්දසිරි

------------------------------------------------------------------------------------------------------------

"රසයි කිරි නැ දියාරු - ගතයි සිතයි පිනා"

 (උපුටා ගැනීම - ලකිඳු පිරිස් ගෙන් )

මේ අදින් වසර 72කට පමණ පෙර අමරදේවයන් වයස 15දි ගායනා කල ඔහුගේ පලමු ගීයයි. 

------------------------------------------------------------------------------------------------------------

ප.ලි 

හෙළයේ මහා ගාන්ධර්වයා වන "පණ්ඩිත් අමරදේවයන්ගේ" 88 වැනි ජන්ම දිනය නිමිත්තෙන් මේ සටහන තැබීමට සිතුනා.දිවයින පුවත් පතේ කලකට පෙර පළවූ ලිපියකින් හා අන්තර් ජාලයෙන් උපුටා ගත්තේමි .සිය ගණනක් ගීත අතරින් කීපයක් ඔබ වෙනුවෙන් තෝරා ගත්තා ...

අඩුපාඩු පෙන්වා දෙන්න ..
------------------------------------------------------------------------------------------------------------

ප.ප ලි 

අද දින උපන්දිනය සමරන අපේ එලද බ්‍රා සහෝදරයාගේ පුතණුවන්ටද "සුභ උපන් දිනයක් " පතනවා ..

"අදයි පුතේ ඔබේ උපන් දිනේ
වැඩෙයි මගේ හදවතේ සෙනේ
මා සතු වස්තුව ඔබයි පුතේ
මා සතු වස්තුව ඔබ සතුවේ .."

ගායනය - කේ. සේන