ඇය නමින් ලීලා අශෝකාය. දැන් ඇගේ වයස අවුරුදු අනුඑකකි. යොවුන් වියේදි බොහෝ හැඩකාරව සිටින්නට ඇතැයි ඈ දෙස බැලු බැල්මට පෙනේ.
“මගේ නම හේවා ගීගනගේ ලීලාවතී. මම උපන්නේ එක්දහස් නවසිය විසි හතේ ජූලි හත්වැනිදා. මගේ පියා නැති වෙලා තියෙන්නේ අයියයි මමයි පුංචි කාලේ. අම්මා නැවත විවාහ වෙලා තියෙනවා. අපේ බාප්පා කවදාවත් අපට වෙනස්කමක් කළේ නැහැ. ඔහු කලාවට බොහෝම කැමැති කෙනෙක්. ඒ නිසා ඔහු අපේ කලා හැකියාවන් දියුණු කර ගැනීමට උදව් කළා.”
ඇය සිය අතීත මතක අවදි කරන්නට වූයේ බොහෝ සෙමෙනි. ඇයට දැන් බොහෝ අතීත තොරතුරු අමතකය. නමුදු බොහෝ වේලා කල්පනා කිරීමෙන් පසු ඇය සිය අතීතය සිහිපත් කරයි.
“මං ඉගෙන ගත්තේ කොළඹ මියුසියස් විද්‍යාලයේ. අපේ ගෙවල් තිබුණේ තිඹිරිගස්යායේ. එක්දහස් නවසිය හතළිස් අටේ නිදහස් උත්සවයට ජාතික ගීය ගයන්න අප තෝරා ගත්තා. කරුණාරත්න ගුරුතුමිය තමයි අප තෝරා ගත්තේ මර්සලින් ජයකොඩි පියතුමා අපට ගීය පුරුදු කරන්න ආවා මතකයි. මේ ඉන්නේ මගේ අනෙක් යෙහෙළියෝ.”
