Friday, April 6, 2018

තරුණ හිතට මිහිර රැගෙන ආපු කුරුල්ලා


ඔහු සී. (කොම්පඤ්ඤගේ) ඩී. (ඩැනියෙල්) ෆොන්සේකා ය.ඉතාම මියුරු ගීත රැසක් ගී ලොවට එක් කළ අති දක්ෂ ගායකයෙක් කිසිදු ඇගැයීමකින්, බුහුමනයකින් තොරව මීට අවුරුදු 30 කට ඉහතදී (1986 මැයි 11) අපෙන් සදහටම සමුගෙන ගියේ ය.1932 පෙබරවාරි 27 වැනි දින වැල්ලවත්තේ උපන් සී.ඩී. ෆොන්සේකා කතෝලිකයෙකි. මූලික අධ්‍යපනය ලැබුවේ මොරටුව ශාන්ත සෙබස්තියන් විද්‍යාලයෙනි.ඔහුගේ පියා (සී.ඒ. ෆොන්සේකා) ටවර්හෝල් යුගයේ ප්‍රකට සංගීතවේදියෙකි. සී.ඩී. පියා වෙතින් මෙන් ම සංගීතඥ මහේෂ් ෂින්නයියා වෙතින් ද ගායනය හදාරා ඇත. 1956 දී ගුවන් විදුලි සරල ගී ගායකයකු ලෙස සී.ඩී. ගායන ක්ෂේත්‍රයට ප්‍රවිෂ්ට වූයේ ය. ‘කඳුකරේ කිරි ඇල්ලෙහි පාවී’ ඔහු ගැයූ මුල් ම ගීතය වන්නේ ය. ඉන්පසු ඔහු ගැයූ ‘ඔයාට රත්නෙ මං ආදරෙයි’, ‘කවටකමට ඔබෙයි මගෙයි නම ලියා’, ‘පුළුන් වගෙ සුදු රැවුල් දිගයි’ (ඇන්ජලින් ගුණතිලක සමඟ) ‘සිහිල් සුළං පාවී ලොව දසත හමන්නේ, මේ නත්තල් කාලේ බව ලොවට කියන්නේ’, ‘දෑස පුරා සිත නළවන ලතාවයි’ වැනි ගීත අතිශය ජනප්‍රිය වූයේ ය.සී.ඩී. ප්‍රතිපත්තියක් වශයෙන් කිසිදාක අනුකාරක ගී ගායනා කළේ නැත. ඔහු ගැයූ ගී බොහොමයකම තනු ඔහු මෙන් ම කිසිදා ඇගැයීමකට පාත්‍ර නොවූ සංගීතඥ පැට්රික් දෙනිපිටියගේ ය. ඇතැම් ගී තනු සී.ඩී. ගේම ය. උදා. ඔයාට රත්නේ, ඈත කඳුරැලි, පුංචි රැහැයියෝ, පාවඩ දාලා, සෙඳ් තනියට වැනි ගීත සඳහන් කල හැක .‘පුංචි රැහැයියෝ නාඩන්’, ‘රහසේ කීව ප්‍රේමකතා නෑ’, ‘සමන් වැලේ මල් ජයට පිපීලා’ (දියණිය ශර්මිලා සමඟ), ‘කැකිරි පැලෙන හිනා’, ‘සඳේ තනියට පහන් තරුවක්’ සී.ඩී. එකල ගැයූ තවත් ගීත කීපයකි.

සී.ඩී. ගැයූ එක්තරා ගීත දෙකක් මෙරට පොප් සංගීත කලාවේ වැදගත් අවස්ථාවක් සනිටුහන් කරයි. ඒ ඔහු රසිනා යකීම් ගැයූ ‘උඩරට මැණිකේ මනහර කඳුරට තිලකේ’ හා මිනෝන් රත්නම් සමඟ ගැයූ ‘පාවඩ දාලා පා ඔසවාලා, මංගල යුවළ පැමිණ සිනා නඟාලා’ නම් වූ ගීතයයි. සී.ඩී. චිත්‍රපට පසුබිම් ගායකයකු වශයෙන් දැක්වූ දායකත්වය ද ඇගැයුමට ලක්විය යුතුය. ‘තරුණ හිතට මිහිර රැගෙන ආපු කුරුල්ලා’ (සැනසුම කොතැනද?) ‘ඈත කඳුරැලි සිඹ සිඹ දැවටිලා’ (සැඟවුණ මැණික - සී.ටී. ප්‍රනාන්දු සමඟ) ‘සුරපුර වැනි සැණකෙළියක් ගමට ගෙනැල්ලා’ (පේනවා නේද - එම්.එස්. ප්‍රනාන්දු, සී.ටී. ප්‍රනාන්දු සමඟ) ‘සල්ලි සල්ලි සල්ලි (රන්ඔංචිල්ලා) ‘සරා සළෙල හැඟුම් බරට’ (කතුරු මුවත් ඇන්ජලින් ගුණතිලක සමඟ) එවන් ගී කීපයකි.

එකල සී.ඩී. ගේ ගීත මොනතරම් ජනප්‍රිය වීද කිවහොත් ඔහුගේ ‘උඩරට මැණිකේ මනහර කඳුරට තිලකේ’ නම් වූ ගීතය ‘රුහුණු කුමාරි’ චිත්‍රපටයට ඇතුළත් කර ගැනිණි.වෘත්තිමය වශයෙන් සී.ඩී. ටෛම්ස් ඔෆ් සිලෝන් සමාගමේ සේවය කළ අතර පසුකලෙක ගොඩනැගිලි ද්‍රව්‍ය සංස්ථාවේද සේවය කළේ ය.සී.ඩී. විවාහ වී සිටියේ ශීලා ෆොන්සේකා සමඟ ය. ශිරෝමා, ඩිලන්තා, ශිරාන්, ඩිල්රුක්ෂා හා ශර්මිලා සී.ඩී. ගේ ආදරණීය දරුවන් පස්දෙනා ය.ඔවුන් සියල්ල හැරදා සී.ඩී. 1986 මැයි මස 11 වැනි දින මෙලොවින් සමුගත්තේ ය.

උපුටා ගැනීම සිළුමිණ පුවත්පතිනි 
(විශේෂ ස්තුතිය - මුලාශ්‍ර නිවැරදි කරගැනීමට සහාය වූ මහාචාර්ය සුනිල් ආරියරත්නට හා ගාමිණී ගුණතිලකට./සුනිල් මිහිඳුකුල - ජෝර්ජ් රොබ්සන් ද සිල්වා)
---------------------------------------------------------------------
මොණරා මෙන්න මේ ලෙසේ
කියා රඟයි මගේ ප්‍රියේ
ඔයාට රත්නේ මන් ආදරෙයි
රඟන්නේ ඒකයි විනෝදයේ
මොණරා මෙන්න මේ ලෙසේ
කියා රඟයි මගේ ප්‍රියේ ...

පුංචි පුංචි මල් පිපිලා හරිම ලස්සනයි
රංචු රංචු බඹර රාසි ඒ වටේ දුවයි
රොන් උරන්න රොන් උරන්න තවත් පැණි පිරෙයි
ආදරේට ආදරේම එක වුනා වගෙයි ..

පුන් සඳේ කැළුම් වැදිලා රන් ගොයම් නැටේ
තාරුකා දිලෙන්නේ ඈගේ නෙත් කුසුම් වගේ
සුන්දරිගේ මුණ වාගේ රත් පියුම් දිලෙයි
ආදරේ කියන්න ඔබට මේ පැයේ අගෙයි

ගායනය/සංගීතය - සි ඩි ෆොන්සේකා
ගී පද - ජෝජ් ලෙස්ලි රණසිංහ

----------------------------------------------------------------------
තරුණ හිතට මිහිර රැගෙන ආපු කුරුල්ලා
සිහින ලොවක නටන්න මනමාල කුරුල්ලා
මල්සරා...මල්සරා.....

මල්සරාගෙ දුන්න අපේ අතෙයි තියෙන්නේ
මහ බඹාට මගුල් නැකත අපියි හදන්නේ
මල්සරා....මල්සරා.....

මල්හීයක් ඇදී ගොසින් උක්දඩු දුන්නේ
තරුණ ළදක ගෝමර ඇති ළමැද හැපෙන්නේ
යොවුන් වියේ සුපෙමි හැගුමි ඇයි හංගන්නේ
ළගදිම මංගල යෝගය උදා කරන්නේ
මල්සරා.....මල්සරා...

මල් පැණියෙන් ඔද වැඩිලා හැගුමි මැවෙන්නේ
තරුණ හිතක ආදරයයි එතන උපන්නේ...

ගී පද - ධර්මසිරි ගමගේ
ගායනය - සි.ඩි ෆොන්සේකා
සංගීතය - ප්‍රේමසිරි කේමදාස

----------------------------------------------------------------------

උඩරට මැණිකේ මනහර කඳුරට තිලකේ
කඳුරටතිලකේමනහරඋඩරටමැණිකේ
ඔසරි මාල වළලු කූරු හවඩි ඔබට හරි හැඩයි
සුනිල් ජලේ රණ හංසිය වාගේ
ලළිත ගමන සිත නලවයි මගේ
සුභ ගමන් යන්න සැන්දෑවට නුවර වැව වටේ
මිණි පහන ඔබයි කන්ද උඩරටේ

තෙල් මල් ගෙන දළදා මන්දීරේ
වඳින්න යයි පියගැටපෙල පාරේ
ඔබ දිහා බලන එක බැල්මට වැවේ මල් පිපේ
මනමාලි ඔබයි කඳුකරේ අපේ

නුවර ඇසළ පෙරහැර ඇති කාලේ
මුලු රටම දකී ඔබෙ කෝමල තාලේ
මට මලක් වෙන්න හිතයි ප්‍රියේ ඔබේ පෙම් විලේ
රූ රැජින තමයි මැණික සිංහලේ
උඩරට මැණිකේ මනහර කඳුරට තිලකේ…


පද රචනය: ?
තනුව: පැට්‍රික් දෙණිපිටිය (1958 දී පැට්‍රික් මුල් වරට නිර්මාණය කළ ගීත ත්‍රිත්වයෙන් එකකි)
ගායනය: සී. ඩි. ෆොන්සේකා, ආර්. එස්. මෙන්ඩිස්, රසිනා යකීම් සහ ඇනජලීන් ගුණතිලක

----------------------------------------------------------------------
සමන්වැලේ මල් ජයට පිපීලා
මුළු මිදුල මැ සුවඳයි
අපේ මේ මුළු මිදුල මැ සුවඳයි
හැම ගෙදර මැ මල් රුවට පිපේ නම්
ගම්මානෙමැ සොඳුරුයි.....
දුවේ මේ ගම්මානෙ මැ සොඳුරුයි...

ගමින් ගමට මල් කැකුළු පිපෙන විට
මගෙ රට හරි සුවඳයි...
පියාණනි..මගෙ රට හරි සුවඳයි
රටින් රට ට සුව සුවඳ දුවන විට
මුළු ලෝකෙම සුවඳයි
දුවේ මේ මුළු ලෝකෙම සුවඳයි

සමන් මලක් වී පිපෙන්න ආසයි
මගෙ මේ ගේ මිදුලේ...
පියාණනි මගෙ මේ ගේ මිඳුලේ
සමන් වැලක් වී පිපෙන් දුවේ
ජීවිත මල් ගොමුවේ
පරවී හැලුනත් මිනිස් මලේ
පවතී සුවඳ ලොවේ......

ගායනය - සී. ඩී. ෆොන්සේකා - ශර්මිලා ෆොන්සේකා
ගී පද - අරිසෙන් අහුබුදු
සංගීතය - සී.ඩී.ෆොන්සේකා

----------------------------------------------------------------------
මම වෙමි තාත්තගේ බඩ පිස්සී
එමි ඔබ විදියට හැඩ ගැස්සී
අගේ රිදී රන් රුවන් නොවේ
මගේ නිධානය ඔබයි දුවේ

වින්ද දුකට හද මින් පෙර දා
වන්දි ගෙවන්නද මා කවදා
සුදු මල් කැකුළු ය ගැහැණු ළමයි
හැම කමටම ලොකු හැදුනු කමයි

සෙවනෙහි කීකරු වී ඉන්නම්
සැපදුක එක ලෙස විඳ ගන්නම්
හැදුනොත් ලෝකෙන් දොස් නාසා
දෙවියොත් වස්තුවේ වෙයි ආසා

ගායනය -  සී ඩී ෆොන්සේකා සහ ෂර්මිලාෆොන්සේකා

----------------------------------------------------------------------
දෑස පුරා සිත නලවන ලතාවයි
මුහුණ පුරා රස වෑහෙන හිනාවයි
සිරස පුරා මල් සැරසුණු කලාවයි
මගේ පැලට ඔබ හරි වාසනාවයි..
අහන්න රහස ලංවෙලා කියන්න කනට කොඳුරලා
ලස්සන මුහුණ බල බලා සුසුම් හෙලා...

කටට රහට බතට ඇඹුල හදාලා
ඔබේ අතින් කන්නම් රස බලාලා
විඩා නිවන රස කව් ගී ගයාලා
සැනසෙන්නම් ගමේ පාළු මකාලා
අහන්න රහස ලං වෙලා......

ගලන දියේ දිය රැළි මතූඋනාවේ
රුක් සෙවණේ සිසිළස කැටි උනාවේ
වැලි තලයේ සටහන් ලියවුණාවේ
මගේ හදට ඔබෙ හද එක් වුණාවේ
අහන්න රහස ලංවෙලා කියන්න කනට කොඳුරලා.....

ගායනය -  සී ඩී ෆොන්සේකා

Tuesday, April 3, 2018

කොවුල් සරින් මියුරු - අවුරුදු ඇවිදින් සුමිතුරු...!


සිංහල අවුරුදු ගී හැදුණේ මෙහෙමයි

හෙළයේ මහා මංගල්‍යය “සිංහල දෙමළ අලුත් අවුරුද්ද” ය. ශ්‍රී ලාංකේය ජන ජීවිතය සමඟ බැඳී පවතින සංස්කෘතිකාංගයක් ලෙස සැලකෙන මෙම අවුරුදු සමය තේමා කරගෙන ගුවන් විදුලි, චිත්‍රපට සහ කැසට් ගී රැසක් නිර්මාණය වී ඇත. එම ඇතැම් ගී දශක ගණනාවක් පැරැණි නමුත් අදත් අපේ මතකයේ රැඳී ඇති ගීත වේ. ඒ මතක සමඟින් “සිංහල අවුරුද්ද” විෂය කර ගත් ජනපි‍්‍රය ගීත කීපයකට ගී පද රචනයෙන් සහ ගායනයෙන් දායක වූ කලාකරුවන් කීප දෙනකු සමඟ කරන ලද ආවර්ජනයකි, මේ.

“සිංහල අවුරුද්දේ - මංගල ගී සද්දේ” (ජයන්ත වීරසේකර / සුනිල් ශාන්ත) - “බුලත් හුරුල්ලක් ගෙන අවුරුදු එනවාලු” (මර්සලින් ජයකොඩි පියනම / ෂර්ලි පෙරේරා) - “වඩින්න අප වෙත අවුරුදු කුමරියනේ” - (මහගමසේකර / පණ්ඩිත් ඩබ්ලිව්. ඩී. අමරදේව) - “මල් ගොමු ගුමු ගුමු ගන්වන්නී” (අරිසෙන් අහුබුදු / පණ්ඩිත් අමරදේව) - “අතුරු මිතුරු දඹ දිවතුරු ගහ වැල මල් ලන පියකරු” (සුනිල් සරත් පෙරේරා / පණ්ඩිත් අමරදේව) - “බඹරුන් පිස්සු වැටිලා මල් සිඹැ සිඹැ යන මාසේ” (නිමල් ගුණරත්න) - “බැද්ද පුරා සුදු රෙද්ද වගෙයි අද” (පියසිරි විජේරත්න) - “මේ අවුරුදු කාලේ හිනාවෙයන් රාලේ” (ජයතිස්ස බොරළුගොඩ / ලයනල් රන්වල) - “සිරි ලංකාවම එක නුවරක් වෙයි” (මහාචාර්ය සුනිල් ආරියරත්න / ටී. එම්. ජයරත්න) - “කිරි ඉතිරේවා නව වසරේ” (චිත්‍රානන්ද අබේසේකර / විශාරද දයාරත්න රණතුංග) - “කොහෝ කොහෝ කොහේ ඉඳන් කොහෝ කියනවදෝ” (ආචාර්ය අජන්තා රණසිංහ / මහාචාර්ය සංගීත් නිපුන් සනත් නන්දසිරි, සුජාතා අත්තනායක) - “කොහෝ මල් වාරම්” (ආචාර්ය අජන්තා / එච්. ආර්. ජෝතිපාල, සුජාතා) - “ආවා අවුරුදු දේවී” (කරුණාරත්න අබේසේකර / ජෝතිපාල) - “නව අවුරුදු දා බක් මාසේ” (තිස්ස ඩයස් / ජෝතිපාල) - “මී බී මත්වුණු කොවිළිඳු” (සුනිල් ගුණවර්ධන / කෝලිත භානු දිසානායක, නිර්මලා රණතුංග) - “පුංචි පැලත් මේ කාලේ මාළිගා රජ මාළිගා දොළොස් මහේ නැකත ඇවිල්ලා” (විජය කුමාරතුංග, චන්ද්‍රලේඛා පෙරේරා) වැනි සිංහල අවුරුද්ද විෂය කරගෙන නිර්මාණය වී ඇති ගීතාවලියට චිත්‍රපට ගීත ක්ෂේත්‍රයෙන් එක් වූ “ඇවිල්ලා ඇවිල්ලා සිංහල අවුරුද්ද ඇවිල්ලා” (“ධීවරයෝ” චිත්‍රපටයට කරු / මොහිදින් බෙග්, ක්‍රිස්ටි ලෙනාඩ් පෙරේරා, මල්ලිකා කහවිට) - “කන්ද උඩින් සඳ පායන ලීලා” (“බක්මහ දීගේ” චිත්‍රපටයට දයානන්ද / ආචාර්ය වික්ටර් රත්නායක) - “බුලත් අතයි රබන් හඬයි කොහා හඬන මිහිරි නදයි” (“පොඩි මල්ලී” චිත්‍රපටයට ධර්මසිරි ගමගේ / සමූහ ගැයුමකි) - “මී අඹ අත්තේ කොහෝ කොහෝ” (“චංචල රේඛා” චිත්‍රපටයට ආචාර්ය අජන්තා / මිල්ටන් මල්ලවආරච්චි, නීලා වික්‍රමසිංහ) වැනි ගීත ද මේ වසන්ත සමයේ උදාන ගීතයන් ය.

ජනප්‍රියම ගීතයකට දායක වෙන්න ලැබුණා
ක්‍රිස්ටි ලෙනාඩ් පෙරේරා
ඇවිල්ලා ඇවිල්ලා සිංහල අවුරුද්ද ඇවිල්ලා
වරෙල්ලා වරෙල්ලා වැල්ලෙ පදිමු රන් ඔන්චිල්ලා...!

(පද - කරුණාරත්න අබේසේකර)
(ගායනය - මොහිදින් බෙග්, ක්‍රිස්ටි ලෙනාඩ්, මල්ලිකා කහවිට)

සිංහල අවුරුදු ගී අතරින් වැඩි ජනප්‍රියත්වයක් හිමි කර ගත් “ඇවිල්ලා ඇවිල්ලා සිංහල අවුරුද්ද ඇවිල්ලා” ගීතය නිර්මාණය කිරීමේ දී ගායනයෙන් දායක වූ ක්‍රිස්ටි ලෙනාඩ් පෙරේරා මෙම ගීතය පිළිබඳ අප සමඟ මතක අවදි කරමින් මුලින්ම අප සමඟ කතාබහට එක්වූවේ මෙලෙසින් ය.

“මම, මොහිදින් බෙග් සහ මල්ලිකා කහවිට සමඟයි මේ ගීතය ගායනා කළේ. මේ ගීතය නිර්මාණය කරන්න දායක වූ ගී පද රචක කරුණාරත්න අබේසේකර, සංගීතඥ එම්. කේ. රොක්සාමි වගේම රඟපෑමෙන් දායක වුණු ගාමිණි ෆොන්සේකා සහ විජිත මල්ලිකා ඇතුළු කිසිවකු මේ වන විට ජීවතුන් අතරේ නැහැ. ඉන්නේ මල්ලිකා කහවිටයි මමයි විතරයි.

මේ ගීතය රූපගත කළේ හැඳල විජය චිත්‍රාගාරය අසල එළිමහනේදියි. ගාමිණි, විජිත මල්ලිකා සමඟ මමත් පෙනී සිටියා ඒ ජවනිකා වල. අපි ඒ රූප රාමුවල ගීතය ගයමින් නටනවා.

ගාමිණි වෙනුවෙන් ගායනය කළේ බෙග්. ඉන්පසු අවුරුදු හතළිහක් පමණ කාලයක් ගෙවී ගිහිල්ලත් තවමත් මේ ගීතය හැම සිංහල අවුරුද්දකදීම ඇහෙද්දී හරිම සතුටක් දැනෙන්නේ,

මේ රටේ ජනපි‍්‍රයම ගීතයකට ගායනයෙන් දායක වෙන්න ලැබීම ගැන.”

අමරදේවයන්ගේ තනුවඉතා කදිමයි
සුනිල් සරත් පෙරේරා
අතුරු මිතුරු දඹ දිවිතුරු - ගහ වැල මල් වන පියකරු
කොවුල් සරින් මියුරු - අවුරුදු ඇවිදින් සුමිතුරු...!

(පද - සුනිල් සරත් පෙරේරා)
(ගායනය - පණ්ඩිත් ඩබ්ලිව්. ඩී. අමරදේව)

“ගුවන් විදුලියේ විශේෂ සිංහල අවුරුදු වැඩ සටහනකටයි ‘අතුරු මිතුරු දඹ දිවතුරු’ ගීතය මම මුලින්ම ලියුවේ. පසුව රූපවාහිනියේ ‘අවුරුදු සිරිත’ වැඩ සටහනේ තේමා ගීතය ලෙස මේ ගීතය යොදා ගැනීම විශේෂයෙන් සඳහන් කරන්න ඕනේ. සිංහල අවුරුද්ද තේමා කරගෙන මේ ගීතය පමණක් නොවේ, තවත් ගීත කිහිපයක් මං ලියා තිබෙනවා. ‘දුහුළු වළා පෙළ පාවඩ එළලා අවුරුදු කුමරිය එනවා’ (දීපිකා ප්‍රියදර්ශනී පීරිස්) - ‘බක් මහේ නැකත් ඇවිත් ලක් දනන් සුවපත් කරයි’ (එඩ්වඩ් ජයකොඩි, චරිතා ප්‍රියදර්ශනී පීරිස්) - ‘සැණකෙළි සිරි සිරිලක රඳවා ඔන්චිලි චිලි වාරම් ගයනවා’ (රොඩ්නි වර්ණකුල) වැනි ගී ඒ අතර තිබෙනවා. සිංහල අවුරුද්ද මම රසවින්ද ගමත් සමඟ බැඳුණු සංස්කෘතික වශයෙන් අගයක් ඇති උත්සව සමයක්. මගේ පියාගේ පුරුද්දක් තිබුණා අවුරුද්දට කන්දේ විහාරේ යන. ඒ වගේම උග්ගල්බොඩ තිබුණු ගම් මඩුව බලන්නත් අපි ගියා. බාල, තරුණ, වැඩිහිටි කාටත් ප්‍රබෝධවත් මානසිකත්වයක් ඇති වන කාලයක් ලෙස මේ සිංහල අවුරුදු කාලය හඳුන්වන්න පුළුවන්. ‘අතුරු මිතුරු දඹ දිවතුරු’ ගීතයට පණ්ඩිත් අමරදේවයන් යොදා ඇති තනුව ඉතා කදිමයි. ඔන්චිල්ලා උඩ යනවා වැනි හැඟීමක් දනවන තනුවක්නේ මේ ගීතයට අමරදේවයන් යොදා තිබෙන්නේ. මේ ගීතය ශ්‍රවණය කිරීමේදී ප්‍රබෝධවත් මානසිකත්වයක් ඇති වෙන බවයි මගේ වැටහීම.

හැම අවුරුද්දකම නොවරදවා මේ ගීය ඇසෙනවා
දයාරත්න රණතුංග
කිරි ඉතිරේවා නව වසරේ
ප්‍රීතියෙන් සාමයෙන් පා නගා
ජය මගේ
සතුටු සාගරේ ගිලෙමු
මේ නව වසරේ
කිරි ඉතිරේවා නව වසරේ...!

(පද - චිත්‍රානන්ද අබේසේකර)
(ගායනය - දයාරත්න රණතුංග)

මෙම වසන්ත සමය එළැඹෙන විට කොහෝ ගී නාදය නොවරදවාම ඇසෙන්නාක් මෙන් සංගීතඥ සහ විශාරද ගායන ශිල්පී දයාරත්න රණතුංගයන්ගේ හඬින් ගැයෙන “කිරි ඉතිරේවා නව වසරේ” ගීතය ද නොවරදවාම ඇසෙන්නේ ය.

තරමක අසනීප තත්ත්වයෙන් පසු වුවද දයාරත්නයන් අපේ කතාබහ මග නොහැරියේ ය. “මගේ මේ ගීතය ජනප්‍රිය වෙන්න පෙර ‘බැද්ද පුරා සුදු රෙද්ද වගෙයි අද’ ගීතය තමයි සිංහල අවුරුදු ගීත අතර ගුවන් විදුලියේ ජනප්‍රිය වෙලා තිබුණේ. ‘කිරි ඉතිරේවා’ ගීතය 1978 දීයි චිත්‍රානන්ද අබේසේකරයන් මට ලියා දුන්නේ. ඒ කාලේ ගුවන් විදුලියේ උන්නු රෝහිත විජේසූරියගේ තනුව සහ සංගීතයටයි මං මේ ගීතය ගායනය කෙරුවේ. මෙය හැම සිංහල අවුරුද්දකදීම නොවරදවාම ඇහෙන ගීතයක්නේ. මේ රටේ ජනතාවට ආසිරි ප්‍රාර්ථනා කරන ජනතා ප්‍රසාදය හිමි වූ මෙවැනි ගීතයක් ගයන්න ලැබීම මගේ ගායන දිවියේ භාග්‍යයක් ලෙස මං සලකනවා.”

මෙය ‘බෞද්ධ’ - ‘හින්දු’ අලුත් අවුරුද්ද විය යුතුයි!
මහින්ද දිසානායක
මිණිමුතු මල් මාල දමා
බක් මාසේ
නිල්ල මැදින්
එබී බලනවා
අවුරුදු කුමරි
වසන්ත සමයේ
රූප ශ්‍රියාවී...!

(පද - මහින්ද දිසානායක)
(ගායනය - ජැක්සන් ඇන්තනී, කුමාරි මුණසිංහ)

“මම මේ ගීතය ලියුවේ 1998 දී ‘මියුරුසර වසන්තේ’ ගී වැඩ සටහනේ ‘වැව් බැඳී දනව්වෙන් ගී දිය දෝතක්’ නමින් නාට්‍ය ස්වරූපයෙන් ඉදිරිපත් කළ රූපවාහිනී නිර්මාණයටයි. දැන් සිංහල අවුරුදු සමයේ දී මෙම ගීතය නිතර ප්‍රචාරය කරනවා. මගේ ගම අනුරාධපුර දුනුමඬලාව සුන්දරයි. ඒ වගේම කටුකයි. මෙහි මිනිසුන් විවේකයක් නැතුවම වැඩ කරන ජන කොටසක් වුවත් දුක දිනා සෞන්දර්ය විඳිනවා. මෙහි මිනිසුන්ගේ කෘෂිකාර්මික ජීවන රටාව බැලුවාම ඔවුන්ට මේ අවුරුදු දවස් වලදී තමයි විවේකයක් ලැබෙන්නේ. අවුරුදු නැකැත් වලින් ඔවුන් නව ජීවයක් ලබනවා. බක් මාසේ වෙන කොට කුඹුරු වල ගොයම් පැහිලා රන්වන් කරල් තියෙන්නේ. මේ පරිසරය, මිනිස්සු, මේ ගීතය ලියද්දී මගේ මනස් රූ අතරේ ඹ්වමාන වුණා. එහෙත් මෙවැනි ගීතයකින් පොදුවේ මේ රටේ සියලුම ජනතාව නියෝජනය විය යුතු හෙයින් ‘සත හට සෙත දෙන නැකැත් බලන්නට කදමලු බැඳගෙන නෑගම් යන්නට’ වැනි යෙදුම් යොදා ගෙන මේ ගීතය පද රචනය කළා. මේ ගීතය ලියද්දී මා කුඩා කාලයේ දී පටන් දැක පුරුදු පරිසරය, සිංහල අවුරුද්ද සහ දැන ඉගෙන ගෙන සිටි කාරණා ඇසුරු කරගත්තා.

ජෝති වෙනුවෙන් ලියැවුණු අවුරුදු ගීයක්!
තිස්ස ඩයස්
නව අවුරුදු දා බක් මාසේ
දේශයේ ග්‍රාමයේ
සාමය රැව් පිළිරැව් නැගේ
නව අවුරුදු දා බක් මාසේ...!

(පද - තිස්ස ඩයස්)
(ගායනය - එච්. ආර්. ජෝතිපාල)

“මුලින්ම මා ජෝතිපාලයන්ට ගීත ලියූ “අම්මා” කැසට් පටයට තමයි මේ ගීතය ඇතුළත් වුණේ. එම කැසට් පටයේ නිෂ්පාදක හෙන්රි ප්‍රනාන්දුයි සිංහල අවුරුදු ගීතයක් ලියන්න කියා ආරාධනා කළේ. ‘කිරි ඉතිරේවා නව වසරේ’ ගීතයේම තනුවටයි ‘නව අවුරුදු දා බක් මාසේ’ ගී පද රචනය කෙරුවේ. සරත් වික්‍රම සංගීතයේ දී වෙනසක් කළා. ‘අම්මා’ කැසට් පටය ලංකාවේ අලෙවි කිරීමට පෙර මැද පෙරදිග රටවලයි අලෙවි කළේ. එහිදී ජෝතිපාලයන් සමඟ ඇන්ජලින් ගායනා කළ ‘දෙදෙනා දෙරටක අද අවුරුදු සමරනවා’ ගීතයටත් විශාල ජනප්‍රියත්වයක් හිමි වුණා. මේ ගීත සංකල්පනාවෙන් පැවසෙන්නේ රටවල් දෙකකට වී සිංහල අවුරුදු සමරන සැමියකු සහ බිරියකගේ සංවාදයක්. මගේ මිතුරන්ට මෙන්ම මේ රටේ තව බොහෝ දෙනකුට මේ අත්දැකීමට මුහුණ දීමට සිදු වී තිබුණා. එම අත්දැකීම් ද ඇසුරු කරගෙන තමයි මේ ගීතය රචනා කෙරුවේ.

(උපුටා ගත්තේ - ජෝජ් රොබ්සන් ද සිල්වා)
-------------------------------------------------------------------------------------
කන්ද උඩින් හඳ පායන ලීලා
ලන්ද වෙලේ රුක් අත්තන පිපීලා
මන්ද කොහෝ හඬලනු හැංගීලා
එන්න තමා බක් මහ ළංවීලා

දුන්න බහක් හින්දා මම කැන්දා
යන්න කෙනෙක් ඇත ආදරෙ හන්දා
උන්නෙ මෙතෙක් නැකතක් එන සන්දා
ඉන්න එතෙක් ඉවසන්න ද මන්දා

ගායනය - අමිතා වැදිසිංහ
සංගීතය - සෝමදාස ඇල්විටිගල
ගී පද රචනය - දයානන්ද ගුණවර්ධන
-------------------------------------------------------------------------------------
කොහෝ කොහෝ
කොහේ ඉඳන්
කොහෝ කියනවදෝ
අපේ ගමේ රබන් පදේ
උඹට ඇහෙනවදෝ
කොහෝ කොහෝ

කජු නාඹර රස මී අඹ
ගස් යට වැහි වැහැලා
කොහෝ අන්න අර බලපන්
මී වද පැණි පිරිලා

කොහෝ කොහෝ
බක් මාසේ මඟුල් නැකත් මටත් කියනවදෝ

රබන් හඬට බඹරු නටන
ලස්සන ගම් මැද්දේ
කොහෝ උඹත් ගී කියපන්
සිංහල අවුරුද්දේ

කොහෝ කොහෝ කොහේ ඉඳන්
කොහෝ කියනවදෝ
අවුරුද්දට අපේ ගමේ නෑගම් එනවදෝ

සංගීතය - සනත් නන්දසිරි
ගායනය - සනත් නන්දසිරි, සුජාතා අත්තනායක
ගී පද රචනය - ආචාර්ය අජන්තා රණසිංහ
-------------------------------------------------------------------------------------
මේ අවුරුදු කාලේ

මේ අවුරුදු කාලේ හිනාවෙයන් රාළේ
තෙල් ඉහිරුණු කැවුම් ගෙඩිය වාගේ
අ අ ආ ආ..
දොං තරිකිට කැත්ත දොදොන්
පිළිවට කර කැත්ත දොදොන්
දමා තැල්ල ඩිඟිසි ඩිගොයි
දමා තැල්ල තක තෙයියත්තා

කැවුම් කොකිස් තෙලේ බැදෙයි
කැවිලි සුවඳ සිතට දැනෙයි
බා.. බා.. බා... රන් කිකිළි
ඊයේ උදේ ගිය කිකිළි
බා.. බා.. බා...
ගතිරිඤ්ඤ රිඤ්ඤං ගති ගතගෝ
ගති ගත ගෝ
ඔන්චිලි චිලි වාරම් ගම දෙවනත් වන්නා
මැංගිරි ඩිනිකෝ අවුරුදු ආවෝ
දොං තරිකිට කැත්ත දොදොන්
පිළිවට කර කැත්ත දොදොන්
දමා තැල්ල ඩිඟිසි ඩිගොයි
දමා තැල්ල තකතෙයියන් තා
ගමේ රබන් දොරට වඩී
සිනා මුහුණු අවට පෙනේ
බා... බා.. බා... රන් කිකිළි
ඊයෙ උදේ ගිය කිකිළි
තාම ආවෙ නැ කිකිළි
බා.. බා.. බා...
ගතිරිඤ්ඤං රිඤ්ඤං
ගති ගතගෝ ගති ගත ගෝ
සිංහල අවුරුද්දේ මල් කැකුලක් සේ දිලිසේ
මැංගිරි ඩිනිකෝ
අවුරුදු ආවෝ

පද රචනය – ජයතිස්ස බොරලුගොඩ
සංගීතය – ලයනල් රන්වල
ගායනය – රන්වල සංගීත කණ්ඩායම
-------------------------------------------------------------------------------------
මල් ගොමු  ගුමු ගුමු ගන්වන්නී
මල් ගොමු ගුමු ගුමු ගන්වන්නී
මී වදවලැ පැණි පුරවන්නී
කුරුලු සරන් කන් පිනවන්නී
මුළු ලෝ උයනක් කරවන්නී

ජම්බු ගහට රත පොරවන්නී
බක් මී ගහ කහ අන්දන්නී
අඹ දළු ළා රත තවරන්නී
ලෝ කත විසිතුරු කැරලන්නී

එරබදු පැහැයෙන් දුලවන්නී
නා ගස් සුවඳින් බැඳලන්නී
විලේ නෙලුම් මල් පොබයන්නී
නෙත ගිය ගිය පණවන්නී

ගමේ මෑ පුහුලම් ඉදවන්නී
සොරුන් බවට වවුලන් ලන්නී
නෙ තැනැ වවුලු පළවල් දෙන්නී
ගම් දරුවන් හට වැඩ දෙන්නී

මල් සර හට ගී සපයන්නී
යොවුනන් සිත් ඉන් බැඳලන්නී
දෙක දෙක එක් කැර ඈඳන්නී
නොමිලේ කපු කම් කරවන්නී

වෙන් වූවන් සිත කලඹන්නී
පරණ තරහ හැම යට ලන්නී
ආයෙත් එකමුතු කරවන්නී
පවුල් අවුල් විසඳාලන්නී

කොල්ලන් කෙල්ලන් බැඳලන්නී
මහලු සිතෙත් කෙළි රිසි ලන්නී
ගෙයි ගෙයි බක් වෙස් ගන්වන්නී
අවුරුදු කිරි බත උයවන්නී

දස දෙස සුවඳින් බැඳලන්නී
ගතට සිතට නව පණ දෙන්නී
කුඹුරට ආසිරි සලසන්නී
රට වටැ සොම්නස ගෙනැ යන්නී

සංගීතය හා ගායනය - ඩබ්ලිව්. ඩී. අමරදේව
ගී පද රචනය - අරිසෙන් අහුබුදු
-------------------------------------------------------------------------------------

ඇවිල්ලා ඇවිල්ලා සිංහල අවුරුද්ද ඇවිල්ලා
වරෙල්ලා වරෙල්ලා වැල්ලෙ පදිමු රන් ඔන්චිල්ලා
කොවුලා බට ලී පිඹිනවා කොට්ටෝරුව බෙර ගහනවා
ලේන ගසයි කයිතාලම අවිච්චියා එහි නටනවා

කැවුම් කොකිස් මුං අළුවා කිරිබත්වල රස බැලුවා
ගමේ ළඳුන් කොමල පපා උදේ රබානක් පැලුවා
හබුන් කටයි සුබ නැකතයි දෙගුරුන් හට බුලත් අතයි
ලැබූ අලුත් අවුරුද්දේ කිරි ඉතිරෙයි අපට සෙතයි

ගායනය - මොහිදීන් බෙග්
ගායනය සහාය - ක්‍රිස්ටි ලෙනාඩ් පෙරේරා සහ පිරිස
සංගීතය - එම්. කේ. රොක්සාමි
ගී පද රචනය - කරුණාරත්න අබේසේකර
-------------------------------------------------------------------------------------
නව අවුරුදු දා බක් මාසේ
නව අවුරුදු දා බක් මාසේ
දේශයේ ග්‍රාමයේ සාමය රැව් පිළි නැගේ
නව අවුරුදු දා බක් මාසේ
ගමින් ගමට දේශයේ
නව අවුරුදු සාමයේ
රැව් පිළි රැව් හඬදිදී
මල් බුලතින් සැරසෙති
පන්සලේ හඬ නැගි ගාන්ඨාර රැව් දෙති
නව අවුරුදු දා බක්මාසේ
රබාන රත් කර හොඳින්
පියන් නගයි නව රැඟුම්
කොහෝ ඉඳන් ගී ගයයි
රබාන හැඬවෙන හඬින්
අක්කලා මල්ලිලා එක්කලා නැකත ළංවෙලා
නව අවුරුදු දා බක්මාසේ

ගායනය - එච්. ආර්. ජෝතිපාල
-------------------------------------------------------------------------------------
මී අඹ අත්තේ
මී අඹ අත්තේ කොහෝ කොහෝ
දොළොස් මහේ මඟුල් දොහේ
රබාන රත්වෙන නැකත් වෙලාවට
නලාව පිඹපන් කොහෝ කොහෝ

ගිරා නිලෙන් දිලි ගොයම් ලියද්දේ
උඩින් උඩින් වර පෙත්තප්පු
හෝරාවෙන් නොනගතේ ගෙවෙද්දී
නෑගම් එනවද පෙත්තප්පු

ගම් මැද්දේ සරු අවුරුද්දේ
පච්ච වඩම් පළඳා
හිසතෙල් ගානා ආදර නැකතින්
ඉහෙන් බහින උවදුරු දුරු වී

නෙත් දෙක වාගේ අයිය නගාලට
පින් පල දේ අවුරුදු ජය වී
එක මව් කුසයේ ඉපදේවා අප
මතු මතු සංසාරේ

ගායනය - මිල්ටන් මල්ලවආරච්චි, නීලා වික්‍රමසිංහ
සංගීතය - සරත් දසනායක
පද රචනය - ආචාර්ය අජන්තා රණසිංහ
-------------------------------------------------------------------------------------
ප.ලි
ලිපිය උපුටා ගත්තේ සිළුමිණ පත්තරෙන් ....වෙබ් ලින්කුව වැඩ නැති නිසා පොස්ට් එකක් විදිහට දැම්මේ හැමෝටම බලන්න ...

Tuesday, January 2, 2018

"සංගීතයේ රසයේ වෙළී තනි වූ අපි"




විජිත් කුමාර් සේනාරත්න සංගීතය ගැන විශේෂයෙන් දක්ෂ සංගීත ශිල්පීන් ගැන විශේෂාංග ලිපි ලියන ප්‍රවීණ ලේඛකයෙක්. සුනිල් සාන්තගේ ‍ගෝලයෙක් වශයෙන් සංගීතය පිළිබඳ එක්තරා දැනුමක්ද ඔහුට තිබෙනවා. හෙළ හවුලටද හෙතෙම සම්බන්ධයි.

‘විජිත්ගේ’ ‘රස මතක අසිරිය’ ඔහු ලියූ තුන්වැනි පොත. එමගිනුත් ඔහු දක්ෂ සංගීත ශිල්පීන් සමාජයට හඳුන්වලා දෙන්න උත්සුකව තිබෙනවා. මේ සංගීත ශිල්පීන් මුද්‍රිත හා විද්‍යුත් මාධ්‍යවලින් ඒතරම් ප්‍රචාරය නොලබන, බොහෝ විට තමන්ගේ පාඩුවේ පැත්තකට වෙලා සිටින පිරිසක්. නාමික වශයෙන් සඳහන් කරන්නේ නම් පියදාස අතුකෝරල, එම්. ඩබ්ලිව්. පීරිස්, චන්දදාස බෝගොඩ, වී. හේමපාල පෙරේරා, ශාන්ති ගීතදේව, සරත් සන්දනායක ගන්ට පුළුවන්. ඔවුන් අතරේ නාලිනී රණසිංහ වැනි ගායිකාවකද සිටිනවා.

මොවුන්ගෙන් සංගීත ක්ෂේත්‍රයේ එක්තරා යුගයක ඉතිහාසය අනාවරණය වෙනව වගේම ඔවුන්ගේ නිර්මාණ කවරේදැයි රසිකයන්ට දැනගන්ට කරුණු සැලැස්වෙනවා. අප ඇතැම් නිර්මාණ අසා රසවිඳ තිබුණත් ගායක ගායිකාවන් හැරුනුකොට ඒවාට දායක වූ සෙසු ශිල්පීන් කවුරුන්දැයි දන්නේ අ‍ල්ප වශයෙන්. සමහරවිට දන්නෙම නැහැ.

එම්.ඩබ්ලිව්. පීරිස් ගුවන්විදුලිය ගැන කියා ඇති කරුණු වලින් ගුවන්විදුලියට කීර්තිමත් මෙන්ම අපකීර්තිමත් ඉතිහාසයක් ඇති වගද අපට පසක් කරන්නට පුළුවන්. එක්තරා ඇමැතිවරයකු යටතේ ගුවන්විදුලිය තිබියදී කිසිම සංගීත භාණ්ඩයක් වාදනය කිරීමට නොදන්නා අයෙක් වාදක මණ්ඩලයට පත්කර ගැනුණා. ඔහු රාජකාරිය වශයෙන් කර ඇත්තේ පැමිණීමේ හා පිටවීමේ අත්සන් දෙක තැබීම පමණයි. ඒ අතර කාලයේ ඔහු අතුරුදන්වෙලා තිබෙනවා. එසේම වරක් හමුදාවෙන් පැමිණි එක්තරා පුද්ගලයෙක්ට වාදක මණ්ඩලයේ නායකත්වය භාරදීලා තියෙනවා. එය කර ඇත්තේ ඒ තනතුරට සුදුසු ජ්‍යෙෂ්ඨ ශිල්පීන් සිටියදී. මේ සියල්ල වුණේ රාජ්‍ය ආයතනයක් වශයෙන් ගුවන්විදුලිය දැඩි දේශපාලනකරණය වීමේ ප්‍රතිඵලයක් වශයෙන්. මෙතෙක් අසා තිබුණු ආකාරයට ගුවන්විදුලියෙන් අසාධාරණයක් වුණේ සුනිල් සාන්ත, බී. ඇස්. පෙරේරා වැනි ප්‍රවීණ සංගීතවේදීන්ට පමණක් කියායි.

ඉහත සිද්ධීන්වලින් එම්. ඩබ්.පීරිස් බලවත් සේ කලකිරුණු ශිල්පියෙක්. වඩාත්ම ඛේදජනක සිද්ධිය වන්නේ අසාධාරණයට එරෙහිව නැඟී සිටීමේ වරදට ඔහුට පිහි ඇනුම් කෑමට සිදුවීමයි. එයින් අතේ ඇඟිලිවලට සම්බන්ධ සියුම් නහර කැපීම හේතුකරගෙන ඔහුට බටනළාව ඇල්ලීමට නොහැකි වුණා. පීරිස් මහතාගේ සංගීත භාණ්ඩය වුණේ බටනළාව. අමරදේවයන් ගයන “ඔබේ දෑසයි ඔබේ දෑසයි” ‘සිනිදු සුදු මුතු තලාවේ’, අදර හැඟුම්’, ‘පිපුණු කුසුම පරවූවා’, නන්දා මාලනී ගයන , ‘මලකින් මලකට ගොස් පැණි බොන්නද’, ‘ඔබට මතක නැහැ මට මතකයි’, ‘පිපුණ මලේ රුව’, වික්ටර් රත්නායක ගයන ‘සිහිල් සුළං රැල්ලේ’, ‘තොටුපළ අයිනේ’, ‘සොඳුරිය ඔබගේ වුවන මලක්’ වැනි ප්‍රකට ගී බොහෝමයකට ඔබට ඇසෙන්නේ පීරිස්ගේ වස්දඬු රාවයයි. එබඳු දක්ෂයකුට තමයි මේ හතුරුකම් කෙරුණේ.

පියදාස අතුකෝරල දක්ෂ සිතාර් වාදකයෙක්. ‘සත්සමුදුර’, ‘සාරවිට’, ‘ගොළු හදවත’ වැනි සිනමාපටවල වයන බටනළා හඬ, විශේෂයෙන් ‘‍ගොළු හදවතේ’ සුගත් - දම්මි ප්‍රේමයේ සියුම් සංවේදනා ඔහු මූර්තිමත් කළේ අපූර්ව ලෙසින්. ඒ විතරක් නෙමේ ‘මධුවන්ති’,’ස්වර වර්ණ’, ‘රස මියුරු’ වැනි සංගීතමය විචිත්‍රාංගවල තේමා වාදනවල අසන්නට ලැබෙන්නේ ඔහුගේ සිතාරයෙන් නැ‍ඟෙන මධුර ස්වරයයි.

චන්ද­්‍රදාස බෝගොඩ මිහිරි ගීතනු නිර්මාපක‍ෙයක් ‘නීලවර්ණ නීල කොබෙයියෝ’, ‘මා ප්‍රිය හිමියනි’, ‘පෙම් කළ වරදට’, ‘මගේ නීල නෙතු සඟලේ’, ‘සීත දියවැල් සලා’, ඔහුගේ සුමධුර ගී තනුවලට උදාහරණය. බෝගොඩ පරම්පරාවම සංගීතයට දක්ෂතා දක්වන අය. රෝහණ, චන්ද්‍රපාල, විනිත් ඔහුගේ සොහොයුරන්. ප්‍රවීණ ගායිකා ඉන්ද්‍රානි බෝගොඩ ඔහුගේ සොහොයුරියක්. මේ කුසලතා පූර්ණ සංගීතවේදියා ගැන මා මුලින්ම දැනගත්තේ මේ පොතෙන්. ඒ අනුව මේ පොත සංගීත ඉතිහාසයේ හිස්තැන් නිවැරදිව පිරවීමක් ලෙසත් සලකන්නට පුළුවන්.

වී. හේමපාල පෙරේරා ප්‍රකට අන්ධ බටනළා වාදකයා. ඔහුගේ සංගීත ප්‍රතිභාව වික්ටර් රත්නායකගේ ‘තනිවෙන්නට මගේ ලොවේ’, සුනිල් එදිරිසිංහගේ ‘පුංචි සාවියේ’, එඩ්වඩ් ජයකොඩිගේ ‘මාරම්බරී’, නිරංජලා සරෝජනීගේ ‘කෙදිනද කූඩු හදන්නට’ ගී ඔස්සේ විශද වෙනවා. ‘තනිවෙන්නට මගේ ලොවේ’ ගීතයේ ආරම්භයේ හා අතර මැද ඇසෙන මැන්ඩලින් වාදනය හේමපාලගේය. මෙබඳු දක්ෂ ශිල්පීන් ගැන කතා වෙන්නේ කවුද? අඩුම ගානේ ගුවන්විදුලියේ පළවන සඟරාවකවත් ඔවුන් ගැන ලියැවෙනවාද?

සරත් සන්දනායක, නාලිනී රණසිංහ වැනි ගායක ගායිකාවන් ගැන රසිකයන් අසා තිබුණත් ඔවුන්ගේ නිර්මාණ මොනවාදැයි දන්නේ නැහැ. එහෙමත් නැත්නම් ඔවුන්ගේ ගී අසා තිබුණත් ඒවා ගායනා කරන්නේ මොවුන්දැයි දන්නේ නැහැ. අද ගුවන්විදුලි සේවාවල ගීත රචකයාගේ හා සංගීතඥයාගේ නම තියා ගායකයාගේ නමවත් ප්‍රචාරය නොවන තරම්. එබඳු පසුබිමක් මේ පොතෙත් ඒ අඩුවත් යම් තරමකින් හෝ පිරිමැසෙනවා.

සරත් සන්දනායක හා දයා හේමන්තා අබේසේකර ගයන ‘මද සීත නළ රැල්ල’ ගීතය පසුකලෙක රූකාන්ත - චන්ද්‍රලේඛා යුවළ ගායනා කළා. ඒ නිසා බොහෝ දෙනෙක් හිතුවේ ඒ ගීතය ඔවුන්ගේ බවයි. ඒ ගැන ‘රස මතක අසිරියේ’ මෙසේ සඳහන් කර තිබෙනවා.

“සිය නැඟණිය වූ දයා හේමන්තා අබේසේකර සමගින් ‘වහල් දූපත’ තිර පටයට ගැයූ ‘මඳ සීත නළ රැල්ල’ ගීය ඔවුන් ජීවත්ව සිටියදීම වෙනත් ගායක ගායිකා යුවළක් යළි ගැයීමේ නොහොබිනා ක්‍රියාව ගැන සරත් තුළ දැඩි කලකිරීමක් හා කනගාටුවක් ඇති විය. සොරා කා මුසා ඇද බා ඒ බවට පුරාජේරු දෙසන තරමට පිරිහුණු රටෙක ඒ නහීන ක්‍රියාව සාධාරණී කිරීමට ඉදිරිපත් වන්නන්ද සිටීම මවිතයට නොතරම්ය.”

‘අක්කේ ටිකක් එන්නකෝ’, ‘ජීවිතේ අපේ වාසනාවේ’, මල් පීදුණා’, ‘සක්වළ ලෝකයක් කළා’ ලෝකය සිහිනයක් කළා’ ‘මා මිණි මාමිණි මා දෙයියා’

(විමල් ජේ. සාගර සමග) සරත්ගේ රස සමාහිත තවත් ගී කීපයක්.

නාලිනී රණසිංහගේ මනරම් ගී හඬ අප මුලින්ම ඇසුවේ ‘මී මැස්සෝ’ චිත්‍රපටයෙන්. ඒ චිත්‍රපටයේ එන සහන් සුවය ඇලුම් වැඩූ ඒ දුනුකේ මල’ ගීතය ගැයුවේ ඇය. ඉන්පසු සුනිල් සාන්තගේ ගීවලට ඇය සහාය ගායිකාවක් විදියට දායක වුණා. ‘එම්බා ගංගා’, ‘තෙල්ගාලා හිස පීරන් නෑනෝ’, ‘සරද වලා ගැබ’, ‘මල් ගොමු ගුමු ගුමු ගන්වන්නි’, ‘මලේ මලේ’ වැනි ගීත ඊට නිදසුන් . මර්සලීනු ජයකොඩි පියතුමාගේ විශිෂ්ට නිබන්ධනයක් වන ‘කහවන් ගොයමට රන්දිය වැහැලා’, ගීතයත් නාලිනීගේ.

විජිත් කුමාර් හෙළ හවුලෙන් ලද ආභාසය නිසා ඉතාම ව්‍යක්ත භාෂාවක් පරිහරණය කරනවා. ඒත් අන්තවාදී විය යුතු නැහැ. ගුවන් විදුලියට ‘රෙදෙව්ව’ කියා කීමෙන් ඇති ප්‍රායෝගික වැදගත්කමක් නැහැ. ඒක හරියට සෙන්ට් පීටර්ස් රෝඩ්’ කියන එක ‘උපාසක පීටර්ගේ වත්ත’ කියා ලිවීමක් බඳුයි. ඒවා හාස්‍යජනකයි.

අද ගුවන්විදුලියේ දැඩි පරිහානියක් දක්නට ලැබෙනවා. එක කකුලක් පත්තර කන්තෝරුවලත් අනිත් කකුල ගුවන්විදුලියෙත් තියාගෙන ආධිපත්‍යයක් පැතිරවීමට තනන අඥාන උපදේශකවරුන් යහපාලන ආණ්ඩුවත් අමාරුවේ දාලයි නවතින්නේ. ගිය ආණ්ඩුවත් අමාරුවේ දැම්මේ මේ වගේ කලාකාරයෝ ටිකක් තමයි. ඔවුන්ට පන්න පන්නා පහර නොදී මේ මාධ්‍ය රැකගන්න බැහැ කියා මා අවධාරණය කරනවා.

අවසාන වශයෙන් විජිත් කුමාර්ගේ ඊළඟ පොත ලිවීමේදී අවධානය යොමු විය යුතු සංගීත ශිල්පීන් කිහිප දෙනෙකුගේ නම් සඳහන් කරමින් මේ තීරුව අවසන් කරනවා.

විජය සිරිවර්ධන පොළොන්ඕවිට, සෝමසිරි ඉලේසිංහ, ගලගෙදර එම්.එම්. ඒ.හක්, ටියුලින් ජයරත්න, වීරසේන ගුණතිලක, ඩික්සන් ගුණරත්න (‘ගෝල්ඩන් චයිම්ස්’ වාදක මණ්ඩලයේ හිටපු ලංකාවේ දක්ෂතම ලීඩ් ගිටාර් වාදකයා) දේවානන්ද වෛද්‍යසේකර, ප්‍රේමදාස මුදුන්කොටුව මොවුන්ගෙන් කීප දෙනෙක් ජීවතුන් අතර ඉන්නවාද නැද්ද කියලා කියන්න නම් මං දන්නේ නැහැ.

(සුනිල් මිහිඳුකුල)
-----------------------------------------------------------------------------------------
ප.ලි 
මේ ලිපිය වැදගත් නිසා දිනමිණ පුවත් පතින් උපුටා ගත්තේ ...බ්ලොග් පාළු වෙන නිසා මේ අවුරුද්දේ වත් ලියන්නම් .තරහ අවසර ..

Tuesday, September 5, 2017

"අන්ධ බව නොපෙනෙ ද මහා මිනිසුන්ගේ"



------------------------------------------------------------------------------------------------------
මෙන්න මේ වීඩියෝව දැක්කම හිතුනා හෙන්රි ජයසේනයන් ගැන ලියන්න ඕන කියලා .විස්තර ටික හොයනකොට හම්බ වුනා අපුරු විස්තර සහිත ලිපියක් .මම ලිව්වත් මෙච්චර හොඳට ලියන්න බැරි නිසා ඒ විස්තර ටික මෙතැනට ගෙනත් දැම්මා හැමෝටම කියවන්න ....


මෙරට නූතන වේදිකා නාට්‍ය ඉතිහාසයේ පුරෝගාමි මෙහෙවරක යෙදෙමින්, එහි අභිවෘද්ධියට කැප වූ ඔහු 1931 ජූලි මස 06 දින ගම්පහ බැන්ඩියමුල්ලේදී මෙලොව එළිය දුටුවේ ය. ලිපිකරුවකු, ගුරුවරයකු ලෙස වෘත්තීය ජීවිතයක් ගත කළ ඔහු පසුව ජීවිත කාලය ම වේදිකා නාට්‍ය කලාව වෙනුවෙන් කැප කළේ යැ යි පැවසීම අතිශයෝක්තියක් නො වේ. රංගධරයකු, නාට්‍ය රචකයකු, පරිවර්තකයකු හා අධ්‍යක්ෂවරයකු ලෙස ඔහු ඉටු කළ සේවය සදා අනුස්මරණීය වේ. හෙන්රි ජයසේන නම්වූ මේ අපූරු සෞන්දර්යවේදියා භෞතිකව අප අතර නොසිටියත් ඔහුගේ නිර්මාණකාය තවමත් අපේ හද මනස පෝෂණය කරයි. එතුමන්ගේ 85වන ජන්ම දිනය සැමරෙන මේ මොහොතේ ‘දිනමිණ’ – ‘රසමංජරිය’ කරන ආවර්ජනාවකි.

‘නොව පැරණිය වන රමණිය විටින්විට’ යනුවෙන් සැලළිහිණි අස්නෙහි සිරි රාහුල හිමියන් කැලණිවෙහෙර ගැන සඳහන් කරන්නාක්මෙන්, මෙරට නාට්‍ය ඉතිහාසය තුළ නොමැකෙන මතකයක් හෙන්රි ජයසේනයන්ට හිමිවේ. එමෙන්ම ඔහුගේ නාට්‍ය බලන සෑම මොහොතක් පාසාම නව අරුත් ගම්‍යකරමින් රමණීයව අප ඉදිරියෙහි සෝභමානව පවතී. මේ අප්‍රමාන මිනිසා පිළිබඳව කියන්නට දුහුනෙකු වූ මා කෙසේනම් සුදුසු වන්නේද? අපි ඔහුට ම ඉඩදෙමු,
“රුක්මණී දේවි ඇතුළු පිරිස සිය නාට්‍ය ඇක්ට් කරන්නේ මෙහි ද? ඔවුන් රඟපාන්නේ මෙහි ද? මා කවදාවත් නාට්‍යයක් දැක නැත. එය කෙබන්දක් දැ යි මට සිතාගැනීමට පවා නුපුළුවන. මා දැන් හුදෙකලාව නැගී සිටින වේදිකාව නමැති මෙම දැව තලය මගේ ඉදිරි ජීවිතයේදී මට බොහෝ සේ බලපාන බැව් මම ඒ මොහොතේ දැන නොසිටියෙමි.”
(කරළියක කතාවක් - 19 පිටුව)

Monday, August 28, 2017

රජ්ජුරුවෝ උඩයි උඩයි

තැන තැන රවුමට ඉඳගෙන
ඉඳහිට එබිකම් කර කර
ලේන්සු හංගන්න ළමයි එක්‌ රොක්‌ වෙන්නා
රවුම වටේ යන විට කවිපද කියෑවෙන්නා

කොපර කොපර පිපිඤ්ඤා
පස්‌ස බැලුවොත් දෙසඤ්ඤා

ළමා කැළ අතරද වැඩිහිටියන් අතරද අතිශය ජනප්‍රිය වූ කොපර කොපර පිපිඤ්ඤා ගීතය තරමටම එහි ගේය කාව්‍ය රචකයා ජනප්‍රිය වූයේ නැත. ජනප්‍රිය වීමට උවමනාවක්‌ද ඔහුට තිබුණේ නැත. ගීතය ජනප්‍රිය වුවද ඒ පිළිබඳ පුරසාරම් දෙසීමටද ඔහු කැමති නැත. ඔහු වඩාත්ම කැමති වූයේ කැලණිය ගුරුකුල විද්‍යාලයේ සිංහල ගුරුතුමා ලෙස පෙනී සිටින්නටය.

අද අධ්‍යාපන ක්‍ෂේත්‍රය දෙස විමසිලිමත්ව බලන කල හොඳ ගුරුවරයෙක්‌ වීම සාරා සංෙඛ්‍ය කල්ප ලක්‍ෂයක්‌ පෙරුම් පුරා බුදු බව ලබන තරමටම වටනේය. දේශපාලන රැවටිලි කාරයන්ගෙන් පිරිහුණු අධ්‍යාපන ක්‍ෂේත්‍රය තුළ අමරසේන කංකානම්ගේ ගුරුතුමා වැනි ගුරුවරුන් දෙවිවරුන් හා සාමානය. ඔහු කෘතහස්‌ත ළමා ගේය කාව්‍ය රචකයෙකු වන්නේද ඔහු ළමා ලොව තුළ සැරිසරන කෘතහස්‌ත ගුරුවරයකුද වන නිසාවෙනි. අමරසේන කංකානම්ගේ ගේය කාව්‍ය රචකයා බුහුමනට ලක්‌වන්නේද කැලණිය ගුරුකුල විද්‍යාලයේ ඔහුගේ සෙවණේ හැදී වැඩී නැණැස පාදාගත් ඔහුගේම ගෝල පරම්පරාව අතිනි. මේ කිනම් අසිරියක්‌ද.

මාතර අපරැක්‌ක, අමරසේනයන්ගේ උපන් බිමය. ඔහු පින්න මලේ සුද දකින්නේ මේ බිමේදීය. කන්ද කපා හඳ ගෙට එනු දකින්නේද මේ බිමේදීය. ඔහුගේ ගීතවලින් වහනය වන අව්‍යාජ ගැමි සුවඳ ඔහු අපට බෙදන්නේ අතීතයේ ඔහු හා බැඳුණු ගමේකමය. ඔහුගේ හැම ගීතයක්‌ තුළින්ම ගැමි වහර කට වහර විද්‍යමාන වෙයි. ආධුනික ගේය කාව්‍ය රචකයන්ට අමරසේනයන්ගේ ගී තුළින් මතු කෙරෙන භාෂාත්මක ව්‍යවහාරය තවත් තක්‌සලාවක්‌ වනු ඇත.

පින්න මලේ සුද ඇන්න ගිහින් වද
මූණ පුරා පෙම් පිරිලා
ඉන්න එපා නුඹ හැන්දැකරේ දොර
කන්ද කපා හඳ ගෙට එන්නා

අමරසේනයන් කුඩා වියේදීම තාත්තා මිය යැම හේතුවෙන් ඔහුට අපරැක්‌ක අතහැර කොළඹට පැමිණීම සඳහා අපරැක්‌ක මහා විද්‍යාලයෙන්ද සමුගන්නට සිදුවෙයි. කුඩා අමරසේනයන්ගේ දඩබ්බරකම් හිතුවක්‌කාරකම් හඳුනා ගන්නා සිය මව කොළඹ පදිංචි තම වැඩිමහල් දියණිය බාරයට ඔහු පත් කරයි එතැන් සිට කොළඹ ලංකා සභා විද්‍යාලයේදී අමරසේනයන් සාමාන්‍ය පෙළ දක්‌වා අකුරු උගනී. මරදාන ශ්‍රී ලංකා විද්‍යාලයෙන් උසස්‌ පෙළ හදාරයි. එවක අද ප්‍රවීණ ගේය කාව්‍ය රචකයකු වන සුනිල් සරත් පෙරේරා මහතාද ඔහුගේ පංති සගයෙකු වෙයි.

විද්‍යාලංකාර විශ්වවිද්‍යාලයේ ශාස්‌ත්‍රවේදී (බී ඒ) උපාධිය ලද අමරසේනයන් ගුරු වෘත්තියම කරකාර බැඳ ත්‍රිකුණාමලයේ මහවැලිගම මහා විද්‍යාලයට මුල්ම පත්වීමක්‌ ලබයි. ඒ ආසන්න වසරේදීම 1971 දී ඔහු තරුණ කැරැල්ලේ සැකකටයුතු පුද්ගලයෙකු ලෙස අනුරාධපුර බන්ධනාගාර ගත වෙයි. ප්‍රකට නවකතා රචකයකු වන ජයසේන ජයකොඩිද ඔහු සමග එකම සිර මැදිරියකට කොටුවෙයි. බන්ධනාගාරයෙන් නිදහස්‌ව පෙරළා මහවැලිගම මහා විද්‍යාලයට පැමිණි ඔහු බන්ධනාගාර ගතවීමේ වරදට වැඩ තහනමකට ලක්‌වෙයි.

වැඩ තහනමට ලක්‌වූ මෙසමය තුළ ඔහු කුමාර් රූපසිංහ මහතාගේ ජන වේගය වැඩසටහනේ ක්‍රියාකාරී සාමාජිකයකු විය. හිටපු අමාත්‍යවරයකු වන අමරසිරි දොඩංගොඩ හිටපු මහජන බැංකු සභාපති සී. කරුණාජීව මහත්වරුන් සමග වෘත්තීය සමිති ව්‍යාපාරයේද ප්‍රධාන නියමුවකු විය.

නිල් නුවන් පෙඟෙන අඳුර ගලා
නුරාවෙන් වෙලී
මල් පිපෙන සුළඟ නීල වළා
තුළට ගුලි වෙවී
සඳ හොරෙන් සිනා වී - නිල් දියමතට පාවෙමින්
හදේ දොරටු විවර කළෙමි සොඳුර නුඹ නමින්

සොඳුර නමින් හදේ දොරටු විවර කර ගත් පසු අමරසේන කංකානම්ගේ මහතා කැලණිය ගුරුකුල විද්‍යාලයේ සිංහල ගුරුතුමා ලෙස පත්වීම් ලබයි. එතැන්හිදී හමුවන සංගීත ගුරුතුමා විශාරද එඩ්වඩ් ජයකොඩි ගායන ශිල්පියාණන්ය. එඩ්වඩ් ජයකොඩි ශිල්පියාණන් විසින් ඉදිරිපත් කළ රූපවාහිනී ගායනා වැඩසටහනට අමරසේනයන් ඔහුගේ ප්‍රථම ළමා ගීය ඉදිරිපත් කරයි. එතැන් සිට වැඩිපුරම ළමා ගීයට ජීවය දුන් අමරසේනයන් 2008 වසරේදී සංස්‌කෘතික අමාත්‍යාංශය මගින් ප්‍රශස්‌ථතම ළමා කාව්‍ය රචකයා ලෙස පිදුම් ලබයි. එසේම ඔහු ගේය කාව්‍ය වපසරිය තුළ සිංහල භාෂා භාවිතය පිළිබඳව පෙළහර පාන්නේ සිංහල භාෂාව සඳහා ශාස්‌ත්‍රපති (එම් ඒ) උපාධිධාරියකු වන බැවිනි.

(සුනිල් ආර්. ගමගේ)
-----------------------------------------------------------------------------------
රජ්ජුරුවෝ උඩයි උඩයි
මිටි කොල්ලෝ බිමයි බිමයි 
රජ්ජුරුවෝ ....
උඩයි උඩයි
මිටි කොල්ලෝ බිමයි බිමයි

මතකද ඒ පුංචි අපේ සෙල්ලම් කාලේ
පුංචි අපිත් එක මොහොතක් රජවුණි බාලේ

කොස් කොළ ගෙන ඔටුණු හදල හිස පළඳින්නා
සිංහාසනයක් අටවා එහි රජ වෙන්නා
යුක්තිය පසිඳා ලන්නට නඩු විසඳන්නා
වැරදි හොයා රජු කාටත් දඬුවම් දෙන්නා

රජ්ජුරුවෝ උඩයි උඩයි
මිටි කොල්ලෝ බිමයි බිමයි 
රජ්ජුරුවෝ ....
උඩයි උඩයි
මිටි කොල්ලෝ බිමයි බිමයි

මතකද ඒ පුංචි අපේ සෙල්ලම් කාලේ
පුංචි අපිත් එක මොහොතක් රජවුණි බාලේ

එකෙක් ඇතෙකු වී රජු ඒ ඇතු පිට යන්නා
කෙසෙල් පතුරු කඩුව අරන් යුද්ධ කරන්නා
එකින් එකා පොරකාගෙන රජකම ගන්නා
ඒ රජකම ගෙනියන හැටි තවම නොදන්නා

රජ්ජුරුවෝ උඩයි උඩයි
මිටි කොල්ලෝ බිමයි බිමයි 
රජ්ජුරුවෝ ....
උඩයි උඩයි
මිටි කොල්ලෝ බිමයි බිමයි

මතකද ඒ පුංචි අපේ සෙල්ලම් කාලේ
පුංචි අපිත් එක මොහොතක් රජවුණි බාලේ

ගායනය - එඩ්වඩ් ජයකොඩි
ගී පද - අමරසේන කංකානම්ගේ
තනුව - එඩ්වඩ් ජයකොඩි
-----------------------------------------------------------------------------------
ඉස්සර විදියට දුව පැන යන එක
මතකද තහනම් කරපු දිනේ
සෙල්ලම් වයසට ඉන්නේ කොහොමද
කියන්න පොඩි හාමුදුරුවනේ

කරඹ කැලෑවට වවුලෝ ඇවිදින්
රෑ තුන්යම රජ මඟුල් කතී
පාළුව දැනුණම මෙරු රැළ තරහින්
වැලි මාළිග වට කුලල් කතී

ඉස්සර විදියට දුව පැන යන එක
මතකද තහනම් කරපු දිනේ
සෙල්ලම් වයසට ඉන්නේ කොහොමද
කියන්න පොඩි හාමුදුරුවනේ

රෑ කල තනි යහනේ සැතපෙන විට
දැනුණිද මවකගෙ සෙනෙහෙ ගුණේ
බුදු බණ එතකොට සිහියට එනවද
කියන්න පොඩි හාමුදුරුවනේ

ඉස්සර විදියට දුව පැන යන එක
මතකද තහනම් කරපු දිනේ
සෙල්ලම් වයසට ඉන්නේ කොහොමද
කියන්න පොඩි හාමුදුරුවනේ

ගායනය - එඩ්වඩ් ජයකොඩි
ගී පද - අමරසේන කංකානම්ගේ
තනුව - රෝහණ වීරසිංහ
-----------------------------------------------------------------------------------
පින්න මලේ සුද ඇන්න ගිහින්වද
මුහුණ පුරා පෙම් පිරිලා
ඉන්න එපා උඹ හැන්දෑකරේ දොර
කන්ද කපා හඳ ගෙට එන්නා ....

දුන්න වගේ නැමි බණ්ඩි කුරක්කන්
අන්න බලාපන් අත වනතේ
මන්ද නඟේ උඹ යන්නෙ ගමෙන් පිට
ගං ගොඩ වෙල් එළි පාළු වෙතේ


ඉන්නෙ මොකෝ වැට ඉන්න වගේ නුඹ
එන්නෙ අළුත් අවුරුදු කාලේ
ගන්න එපා පර දේස සිරිත් නෙක
මේක අපේ සිංහල දේසේ

ගායනය - එඩ්වඩ් ජයකොඩි
ගී පද - අමරසේන කංකානම්ගේ
තනුව - රෝහණ වීරසිංහ
-----------------------------------------------------------------------------------
තැන තැන රවුමට ඉඳගෙන
ඉඳහිට එබිකම් කර කර...//
ලේන්සු හංගන්න ළමයි එක් රොක් වෙන්නා
රවුම වටේ යන විට කවි පද කියවෙන්නා

කොපර කොපර පිපිඤ්ඤා
පස්ස බැලුවොත් දෙසඤ්ඤා..//

පැණි මොර මල් පිපුණු රෑට
කජු පුහුලන් ඉදුණු දාට
පුංචි අපේ සිත් තුළ සතුටක් මතුවෙන්නා
එවන් අසිරි සිරි දුටු සිත් පිනෙන් පිරෙන්නා

කොපර කොපර පිපිඤ්ඤා
පස්ස බැලුවොත් දෙසඤ්ඤා..//

කුන්දු පැනල නැටුවෙත් අපි
වච්චි කියල දිව්වෙත් අපි
හරිම වැඩේ අද ළමයින් ඒව නොදන්නා
වෛයිවාරණ සෙල්ලම් බඩු ගමට ඇවිල්ලා

කොපර කොපර පිපිඤ්ඤා
පස්ස බැලුවොත් දෙසඤ්ඤා..//

ගායනය - එඩ්වඩ් ජයකොඩි සහ ළමා කැළ
ගී පද - අමරසේන කංකානම්ගේ
තනුව - එඩ්වඩ් ජයකොඩි
-----------------------------------------------------------------------------------
චක් ගුඩු ගුඩු
චක් ගුඩු ගුඩු
චක් ගුඩු ගුඩු
චක් ගුඩු ගුඩු චක් ගුඩු ගුඩු චක් ගුඩු ගුඩු චක් ගුඩු ගුඩු
චක් ගුඩු ගුඩු ගුඩේ කියල
ගුඩු පනින්න එමුයි කියල

කොල්ලො කොල්ලො එකට ඉඳල
දෙන්න දෙන්න දෙකට බෙදිල ...//
උච්චි උච්චි තෝල් තෝල්...//

ඉර ද? හඳ ද? ඉර ...

යාළු යාළු දෙකට බෙදිල සටනට සැරසෙයි
නායකයා පොඩි එකාම සටනට පොළඹයි
බඳ හොළවයි
දණ නටවයි
ඉර පැන දඟලයි
ඔහු වැටුණොත් බැට දෙන්නට මුළ පිල පොරකයි

අව්ව ද? වැස්ස ද? වැස්ස...
ඇල්ලු ඇලුලු අය දැවේවි පිල පැන ආවොත්
තල්ලු කරති පිලෙන් යන්න ඔහු ගුටි කෑවොත්
ඇහැ කරකයි
බිම පොරකයි

සටනට ආවොත්
ඔහේ අදිමු උන් දෙන ගුඩු අපි හැමදාමත්
අහස ද? පොළව ද? අහස...

ගායනය - එඩ්වඩ් ජයකොඩි
ගී පද - අමරසේන කංකානම්ගේ
තනුව - එඩ්වඩ් ජයකොඩි
-----------------------------------------------------------------------------------
ප.ලි 
මේ ලිපිය දිවයිනේ පලවූ එකක් .කවුරුත් නොදන්නා ගීත රචකයෙක් ගැන හැමෝටම දැ න ගන්න මෙතැනට ගෙනාවා ... 

Thursday, August 10, 2017

නිකිණි මහේ පරවී ගිය සුවඳ හමන කවි මල්,,,


සිංහලයාගේ ජීවය බඳු හෙළ කවි වෘක්‌ෂයෙන් ගිsලිහී ගිය සුවඳැති මල් කොපමණ ඇද්ද? කෙසේ වෙතත් පර වී ගිය මල්වලින් තවමත් සුවඳ හමන වග අප කවුරුත් පිළිගන්නා සත්‍යයකි. නිකිණි මගේ එසේ පරවී ගිය කවිමල් ගැන මෙසේ සටහන් කර තබන්නෙමු.

ඩෝල්ටන් අල්විස්‌ (ජීවිතයෙන් සමුගත් දිනය 1987.08.01)
ගාලු දිස්‌ත්‍රික්‌කයේ බෙන්තොට ප්‍රදේශයේ උපත ලද මොහු මීතොටමුල්ලේ යූ. ඒ. ඇස්‌. පෙරේරා (සිරි අයියා) කවියාගේ මග පෙන්වීමෙන් කවි ලෝකයට පිවිසියේය.
බොහෝ විට ජාතිකත්වයෙන් ප්‍රබෝධයට පත් වූ ඩෝල්ටන් අල්විස්‌ නම් අපූරු මිනිසා කවියකු මෙන්ම ප්‍රබුද්ධ ගීත රචකයෙක්‌ ද විය.

නිවහල් සිතුවිලි සිතනා සිතත් උදාරයි
එවන් අසිරිමත් ජාතිය ජයෙන් උදාරයි
යශෝ කැලුම් වර ජෝතිය පිනින් උදාරයි

පණ්‌ඩිත් අමරදේවයන් විසින් ගයන එම ගීතය වගේම නන්දා මාලිනියන් ගයන " උඩඟුලියන් ගොතා බඳින නීල වරල සරසන්නට", රන් දහඩිය බිංදු බිංදු, කවුරුදෝ අර කවුලුවෙන්, එගොඩහ යන්නෝ, ආදී තවත් බොහෝ ගීත රචනා කළ ඩෝල්ටන් අල්විස්‌ කිවිවරයාගේ ගීතවල ජාතික අභිමානය මෙන්ම සාහිත්‍යමය රසයක්‌ දක්‌නට ලැබීම සුවිශේෂී කරුණක්‌ විය. කොළඹ තරුණ බෞද්ධ සංගමයේ පුස්‌තකාලයාධිපති ලෙසද සේවය කළේය.
සිංහල භාෂාව, සාහිත්‍යය පමණක්‌ නොව, ඉංග්‍රීසි භාෂාව මෙන්ම, ඒ හා බැඳුණු සාහිත්‍යය පිළිබඳවද හසළ දැනුමක්‌ ඩෝල්ටන් අල්විස්‌ කවියාට තිබිණි.
1987 අගෝස්‌තු 01 වැනිදා දෙමටගොඩ කොළොන්නාව නිවසේදී දැයෙන් සමුගත් ඩෝල්ටන් අල්විස්‌ නම් වූ සුන්දර කලාකරුවා හෙළ පද්‍යවලියේ සහ ගීතාවලියේ සදා නොමැකෙන නාමයකි.
"පින්කෙත හෙළ රන් දෙරණේ යළි උපදින්නට හේතු වාසනා වේවා"

Sunday, June 25, 2017

නුරාව වෙනුවට ඉඳුනිල් දෙනයන දයාව වෑහෙනවා..



70 දශකයේ මෙරට ගීත ක්ෂේත්‍රයේ ස්වර්ණමය යුගයේ, සුභාවිත ගීතයෙන් කලාකෙත පෝෂණය කරන්නට සිය නිර්මාණ දායකත්වය සැපයූ ප්‍රවීණ ගීත රචක සුනිල් සරත් පෙරේරා, සිය නිර්මාණ ඔස්සේ මෙරට ගීත ශ්‍රාවකයින්ගේ රුචිකත්වය වර්ධනයට මහඟු මෙහෙවරක් ඉටුකළ ගීත රචකයෙකි.

පණ්ඩිත් අමරදේවයන්ගේ සිට වර්තමාන නව පරපුර දක්වාම සිය නිර්මාණ තිළිණ කරමින් ගීත සාහිත්‍යයේ වර්ධනයට ඔහු කළ මෙහෙවර අමිලය.

සුනිල් සරත් පෙරේරා ගීත රචනා කලාවට පිවිස ඇත්තේ ගුවන් විදුලියේ ළමා මණ්ඩපයෙනි. ඔහු සිය ප්‍රථම ගීතය රචනා කර ඇත්තේ කරුණාරත්න අබේසේකර ගේ ‘මිණි කිංකිණි’ වැඩසටහනටය. ගීතය ගායනා කර ඇත්තේ ලාලිනී සේමසිරිය.ගී තනු නිර්මාණය තිලකසිරි ප්‍රනාන්දුගේය.

ගීත රචකයෙකු වශයෙන් නිර්මාණ ඔස්සේ කළ මෙහෙවරින් නොනැවතී ඔහු රූපවාහිනි සංස්ථාවේ අධ්‍යක්ෂ ජනරාල්ව සිටි අවදියේ ගීතය රූපවාහිනි මාධ්‍යයට රැගෙන ඒමේ සුවිශේෂිතා හඳුන්වා දෙමින් ‘මනෝහාරී’ ප්‍රාසාංගික වැඩසටහන හඳුන්වා දුන්නේය.

”මනෝහාරි ප්‍රාසාංගික වැඩසටහන මුල් කාලයේ හඳුන්වා දුන්නේ ගීත සාහිත්‍යයට ප්‍රාසාංගික මුහුණුවරක් එක්කරමින්. එදායින් පස්සේ අද වනතුරු එය අනුකරණය කළා මිස ඉන් එහා ගිය නිර්මාණාත්මක දෙයක් කරන්න හිතුවේ නෑ. එදා ‘මනෝහරි’ කළේ මාධ්‍ය අවකාශය තුළ කරපු විශේෂිත අත්දැකීමක් විදියට. ජනපි‍්‍රය, විදග්ධ සහ ජන සංස්කෘතික තුන අතර ගොඩනඟපු පාලමක් විදියට මෙය හඳුන්වා දෙන්න පුළුවන්.

’පෙර දිනයක මා පෙම් කළ යුවතිය’, ‘අනෝතප්ත විල’, ‘මේ මහ කන්ද’, ‘කන්දෙන් ලන්දෙන්’, ‘නිල්ල මැදින් රැල්ල දිලෙන’, ‘පියාසර කර ආමි’, ‘සනරාමර හිමි’ ඇතුළු ගීත රැසක් පණ්ඩිත් අමරදේවයන් වෙනුවෙන් රචනා කළේය. ‘මගේ රටට දළදා හිමි සරණයි’, ‘ඈත එපිට ගම්මානෙන්’, ‘යශෝදරා’, ‘සැන්දෑ කළුවර’, ‘සිනා නඟන්නී’, ‘නවාතැනින් ඈ යනවා’ සංගීත් නිපුන් සනත් නන්දසිරි වෙනුවෙන් රචනා විය.

මේ අතර සෝමතිලක ජයමහ ගයන ‘මහා වරුසාවට පසු’, ‘ඔබ ඇසේ මුදු පහස’, ‘ඔබ දැකුමෙන් යළි’, ‘ගලා යයි ගඟ’, දයාරත්න රණතුංග ගයන ‘සැන්දෑ අහසේ’, ‘මේ අපේ මාතෘ භූමියයි’, නීලා වික්‍රමසිංහ ගයන ‘උදාවුණ හිරු’, ගුණදාස කපුගේ ගයන ‘පසක් කොට ඇති’ ආදියද සුනිල් සරත් පෙරේරා අතින් රචනා වූ ඒවාය.

සුනිල් සරත් පෙරේරා පරිසර සාහිත්‍යයටත් බෙහෙවින් ආදරය කරන කලාකරුවෙකි. ‘සොබා පරිසර සඟරාව‘ ඔහු අතින් නිමවූවකි. ‘ගීත පද රචනා විමර්ශන’, ‘විද්‍යුත් මාධ්‍ය උපදේශන විග්‍රහය’ වැනි ග්‍රන්ථ කිහිපයක්ද රචනා කර ඇති ඔහු කලක් පරිසර අමාත්‍යාංශයේ අතිරේක ලේකම් වශයෙන්ද, රූපවාහිනි සංස්ථාවේ අධ්‍යක්ෂ ජනරාල් වශයෙන් ද, ශි‍්‍ර ලංකා ගුවන් විදුලි සංස්ථාවේ සභාපති වශයෙන්ද කටයුතු කළ අත්දැකීම් සපිරි පරිපාලකවරයෙකි.

”අද බොහෝ වෙලාවට අපට ඇසෙන්නේ හරසුන් බොළඳ ගී පද. විශේෂයෙන් ඒවායේ කිසිදු අර්ථ රසයක් නෑ. ගීතය කියන්නේ සාමූහික ප්‍රයත්නයක්. ඒ වගේම ගීතය සාහිත්‍ය අංගයක්. අදත් අපි අමරදේවයන්ගේ, සුනිල් එදිරිසිංහගේ ගීත රස විඳින්නේ ඒ සාහිත්‍ය අංගය ගීතවල නොමඳව තිබෙන නිසා. ගීතය කියන සාමූහික කලා මාධ්‍යය සංගීතඥයාගෙන් රසවත් වෙනවා. සාහිත්‍යය සදාකාලික වෙනවා. අද ඉන්නේ ගායකයෝ නොවෙයි ඝෝෂකයෝ. අපට ඇහෙන්නේ අරුත් සුන් ඝෝෂාවක් විතරයි.


(උ .ගැනීමකි )

♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫

ඔබ මා සමඟ - අතිනත ගන්නා දවස
මේ මහ කන්ද - බැලුවා හිඳ ගම් සිරස

ඔබ මා අතැර - වෙන නුවරක ගිය විගස
මේ මහ කන්ද බැලුවා - හොරැහින් මදෙස

වෑ දිය නිල්ල - සුදු නෙළුමට මිහිර පොවයි
පාළුව ලුහුබඳින කිරලා - හඬා වැටෙයි

නොකියූ රහස හද උතුරා - වාං දමයි
මතකය සුවඳ - තවමත් මා හදට දැනෙයි


පද - සුනිල් සරත් පෙරේරා
ගායනය සහ සංගීතය – විශාරද ඩබ්ලිව්. ඩී. අමරදේවයන්
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫
මා ඉතින් යන්න යනවා
මට යන්න අවසරයි
මට අරන් යන්න ඇත්තේ
ඒ මතකය විතරයි

නුඹ සඳක් වෙලා පායා
මට එළිය වුණු වගයි
නුඹ සඳක් සේම බැස යයි
මට ඉතිරි කළුවරයි

මගෙ මතක එපමණයි
සඳ එළිය අයිති ලොවටයි
සඳ අයිති අහසටයි
පිණි කඳුළු බිංදු විතරක්
මේ බිමට වැටෙනු ඇයි
මට ඉතිරි එපමණයි


ගායනය - සුනිල් එදිරිසිංහ
ගේය පද - රත්න ශ්‍රී විජේසිංහ
සංගීතය - රෝහණ වීරසිංහ
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫

මහ වරුසාවට පසුව නැගෙන සඳ
වෙනදාටත් වැඩියෙන් එළියයි
නෝක්‌කාඩුවට පසුව ඔබේ වත
ඒ එළියට වැඩියෙන් එළියයි

ඇළ දොළ පාමුල ගොළුවුන ගීයකි
අප හදවත් බැඳි සොඳුරු සෙනේ
අද නොදකින ඔබ හෙට දකිනාතුරු
මඟ බලමින් මා සිත ලතැවේ

ඔබ මට හමුවුන මල්බර මාවත
වෙනදාටත් වැඩියෙන් සුවඳයි
විටකදි නැගුනත් සැක බිය ශෝකය
පිවිතුරු සෙනෙහස හද උතුරයි

පදමාලාව - සුනිල් සරත් පෙරේරා
තනුව - රෝහණ වීරසිංහ
ගායනය - සෝමතිලක ජයමහ
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫


සැන්දෑ අහසේ ඉරට මුවාවෙන්
කාලය කවුලු දොරින් මිය යනවා
සැන්දෑ අහසේ........
ඈත අතීතෙන් පියවර නගමින්
කණ වැල අල්ලන් කවුදෝ එනවා
බලාපොරොත්තුව ලයට තුරුල් වී
ඈ එන පෙර මග බලා සිටිනවා
සැන්දෑ අහසේ.....

දුකට මිහිර දෙන පාලුව තනිකම
මා වට දැවටී කඳුළු සලනවා
අදත් එදා මෙන් නුපුරුදු සුවඳක්
ඒ අතරේ මා වෙතට ඇදෙනවා


ගායනය - දයාරත්න රණතුංග
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫

ඈත එපිට ගම්මානෙන් නැග එන
බටලී හඬ අතරේ..
ඉතාම දුක්බර කවියක් මතුවෙද
ඇය නිදි නොමැති පැලේ..//

මලානිකව හද එලිය ගලා එන
අම්බලමක හෙවනේ..//
බලාහිදිමි ඔබ හිදින විමන් දොර
දැල්වෙන එලිය බදේ..

ඈත එපිට ගම්මානෙන්...

වේදනාව නෙතු අගට ගලාලා
ඉකිලන නිහඬ රැයේ..//
නීල නුවන් තරු කැට බොදවෙනවා
කාටත් හොර රහසේ..

ඈත එපිට ගම්මානෙන්...

ගායනය : මහාචාර්ය සනත් නන්දසිරි
පද රචනය : සුනිල් සරත් පෙරේරා
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫


කන්දෙන් ලන්දෙන් බැස දිවැ එන්නේ..
මා දං බෝවිටියා රස දන්නේ..
නින්දේ දුටු සිහිනය එලි වන්නේ..
සැන්දෑ කුමරිය ගඟට බසින්නේ..

පුරා උදුල ඇගෙ වත සොමි උන්දා
සරා සදක් වේ සිත බැදි ලොල්ලා
නුරා බසක් වී හද එලි දල්ලා
පුරා බඳුන් වී සතුට ගෙනැල්ලා..

කන්දෙන් ලන්දෙන්...

නවම් මහේ මගෙ පැලට වඩින්නේ
උවම් මොටද ඉන් දුක් දුරුවන්නේ..
දෑත සුරල් ගී රබන් වයන්නේ
ගීත සවන් වී බඳුන් පිරෙන්නේ..

කන්දෙන් ලන්දෙන්...

ගායනය : පණ්ඩිත් ඩබ්ලිව් ඩී අමරදේව
පද රචනය : සුනිල් සරත් පෙරේරා
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫

පෙර දිනයක මා පෙම් කල යුවතිය
සිය පුතු නලවනවා...
මගේම ගීයක් නැලැවිලි ස්වරයෙන්
ඈතින් මතු වෙනවා..//

නුරාව වෙනුවට ඉඳුනිල් දෙනයන
දයාව වෑහෙනවා..//
සිනාසුනෙමි මම අවිහිංසක ඇය
කෝල බැලුම් හෙලුවා

හිරුට සඳුට නොකියා හොර රහසේ
කාලය වියැකෙනවා..//
නෙත් අදන්නට බැරි ලෙස රූසිරි
කෙමෙන් මැකි යනවා..

එදා වගේ තවමත් වැට අද්දර
නාමල් පූදිනවා..//
නොකා නොබී දුක් වින්ද අතීතය
යළි මට සිහිවෙනවා..

පෙර දිනයක මා...

ගායනය  : පණ්ඩිත් ඩ්බ්.ඩී. අමරදේව
පද රචනය : සුනිල් සරත් පෙරේරා
සංගීතය : පණ්ඩිත් ඩ්බ්.ඩී. අමරදේව
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫

ඇය යන්න ගියා මැකිලා
වන සිරසක තුරු සෙවනැලි අතරේ
ගී ගයමින් හිද මා තුරුලේ
ඇය යන්න ගියා මැකිලා...
ඇය යන්න ගියා මැකිලා...
පිණි කඳුලක් මල්පෙති අග තවරා
මිහිදුම් සළුවෙන් මුහුණ වසා

නිල්ල නිලන නිල් කදුවැටි අතරේ
සඳ එලියේ මං පෙත පාදා
රහසක් සඟවා ගොළුවූ හදකින්
යන්න ගියා මැකිලා

ඇය යන්න ගියා මැකිලා...

යලි කවදාවත් හමුනොවෙනා බව..
මද පවණක් හිස අතගා කීවද..
අදහාගන්නට නොහැකිය කිසිදින..
ඇය යලි නොයෙතැයි ගිම්හානෙට පෙර..

ඇය යන්න ගියා මැකිලා...

ගායනය : අමරසිරි පීරිස්
පද රචනය : සුනිල් සරත් පෙරේරා
සංගීතය : එච් එම් ජයවර්ධන
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫


පසක් කොට ඇති සසර දුක් ගිනි
උතුම් සම්බෝධිය පතා..
කෙලෙස් නේරංජාව තරණය
කලේ අප මහ බෝ සතා..
පසක් කොට ඇති සසර දුක් ගිනි
උතුම් සම්බෝධිය පතා..

නිසල බෝ මැඬ වෙසෙන අතරෙදි
සසල කෙරුමට අචල හිමි සිතු
නොයෙක් වෙස් පෑ සිතුම් සේනා
ගෙවා ඇත රුදු මාර දෙව් පුතු..

පසක් කොට ඇති...

පෙරුම් දම් බලයෙන් මරුන් බිඳ
බවුන් වඩවා බුදු වු ලොව්තුරු
සහන් එළියක් ලෙසින් මතුවින
නසා තිලොවක අවිදු ගණඳුරු...

පසක් කොට ඇති...

ගායනය : ගුණදාස කපුගේ
සංගීතය : ගුණදාස කපුගේ
පද රචනය : සුනිල් සරත් පෙරේරා
♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫♪ ♫
ප.ලි.
(වැරදි අඩුපාඩු පෙන්වා දෙන්නෝ .ගොඩක් දවසකින් ලියන්න බැරි වුනා .කම්මැලි වෙලා වාගේ .මෙතුමාගේ ඔබ කැමති ගීත සඳහන් කරන්න .පොස්ටුවට එක් කරන්නම් .)